Clú de Productu Sidraturismu Asturies apuesta por un turismu estremáu, de calidá, respetuosu pa cola tradición ya identidá asturianes y con altu valir añedíu, frente al turismu masificáu ya indiscrimináu que se vien careciendo n’Asturies
El Clú de Productu Sidraturismu Asturies cunta con doce empreses y entidaes más tres de l’actu de presentación oficial ya entrega de distintivos a los nuevos miembros. Pente los recién amiestaos hai Conceyos, llagares, pumaraes, establecimientos hosteleros, empreses agroalimentaries ya espublizaciones, lo que da una idega de l’amplitú qu’abarca l’ámbetu sidreru.
En concretu, entregáronse los distintivos Sidraturismu Asturies al Conceyu Xixón, llagar Viuda de Angelón (Nava), Llantíu de Pedro Nieda (Villaviciosa), sidreríes: Parrilla Muñó Poniente y Parrilla Muñó Coto (ambes de Xixón) y Prida (Nava), empresa Los Caserinos (Villaviciosa), allugamientos: Apartantiguo San Isidoro (Uviéu), La Casona de Amaido (San Tirso
d’Abres) y La Llosuca (Villaviciosa), guía turística Elena Borchers (Tourasturias, Uviéu) y empresa de guíes turísticos Vantur (Xixón). Toos tienen en comiá l’apueste por fomentar y dar a conocer tantu la mazana comu la sidre asturiana y tolo que s’ engloba a so alredor.
Tamién se reconoció la primer entidá collaboraora d’esti Clú, l’ Asociación d’Echaores de Sidre d’Asturies, una asociación que ya collabora con dellos miembros del clú.
Los anfitriones de la xornada y socios de l’Asociación Clú de Productu Sidraturismu Asturies, Graciela Blanco, viceconseyera de Turismu Asturies, Víctor Ramos, presidente del Conseyu Regulador DOP Sidra d’Asturies, Ana Soberón, vicepresidenta del Clúster de Turismu Rural d’Asturies y Javier Nievas, Representante de Caxa Rural d’Asturies, agradecieron la adhesión y
apueste por esti proyeutu a los nuevos miembros, gracies a los que se llega a la cifra de 60 empresas y entidaes adheridas. Tamién s’aporfió na intención de xorrecer pali que pali, pero con criteriu, apostando poles sinerxies que van surdiendo pente’l sector sidreru ya’l de turismu, p’algamar un productu turísticu de calidá y estremáu, alrodiu d’un recursu auténticu y de peraltu valir comu ye la Sidre d’Asturies y la Cultura Sidrera Asturiana.
Alberto Rodríguez
This work is licensed under a Creative Commons Attribution 4.0 International License.
