Andecha Astur descarta presentase a les elleiciones estatales por considerar que nestos intres “lo principal ye avanzar na acumulación de fuercies y nel aniciu d’un frente común asturianu, y nun supeditase a la dinámica política estatal”
La decisión foi tomada tres de muncha reflexón ya un seriu alderique internu, ya qu’Andecha Astur siempres considerare fundamental la esistencia d’una alternativa asturiana d’esquierda en tolos procesos elleutorales. N’actual situación consideren que les prioridades pol interés d’Asturies son otres, polo que deciden nun se presentar a les elleiciones estatales nin intervenir nun procesu elleutoral esternu al so ámbetu principal d’actuación.
El procesu d’acumulación de fuercies y aniciu d’un frente común asturianu, asina comu’l llabor del díi ente díi en defensa de los drechos del pueblu asturianu son la prioridá de la formación nacionaliega, que considera que nun puede dexar que la dinámica política estatal, ca vuelta más ayena a la realidá asturiana, interrumpa el so trabayu.
Comprométense, eso si, a siguir cola so propia dinámica, “pidiendo a militantes y simpatizantes un esfuerciu suplementariu p’avanzar nel referíu procesu d’acumulación de fuercies y d’aniciu d’un frente asturianu” y participando, amás de nes campañes propies, na plataforma de xunidá d’aición social que representa ‘Asturies Insumisa`, asina comu na Plataforma Stop Violencies.
Tantu nel ámbetu políticu como nel social, Andecha Astur reitera la so dimposición absoluta, continua y constante a algamar a alcuerdos col conxuntu presones y organizaciones d’esquierda progresista que tean a Asturies como marcu específicu d’actuación.
Redaición InfoAsturies
This work is licensed under a Creative Commons Attribution 4.0 International License.
