La recién estrenada alcaldía de Xixón entra con pie firme, cumpliendo lo fundamental del so programa y entamando les aiciones precises pa qu’esti branu, a costa les arques públiques si fai falta, en Xixón se maten toros
Llucía F. Marqués
Los toros, y con ello quiero decir el so achuquinamientu a la española comu espeutáculu, quieren volver a Xixón. Entérome por un post n’interné, del periódicu El Comercio, nel que la imaxe ta escondía col cartelu de “Contenido sensible. Este enlace se ha ocultado para que las personas puedan decidir si quieren verlo” (escrito n’español, la non oficialidá imposibilita que les redes sociales me falen n’asturianu).
Lo cierto ye que’l citáu conteníu sensible ye un toru morriendo que la prensa “asturiana” esibe con orgullu xunto al titular “Los organizadores de la Feria de Begoña trabajan para que los toros vuelvan a Gijón entre el 14 y el 17 de agosto” (tamién escrito n’español, incluyendo’l topónimu non oficial, por supuestu). Y yo non solo quiero decidir que nun quiero velo, sinón que nun quiero que se faiga na mio ciudá.
Nun quiero convivir con asesinos pro-españoles que tean la tortura por tradición.
Sicasí, les urnes falaron y escoyeron a esta xente, asina que muncho me temo que, pente manifestamientos y voces de protesta nel meyor de los casos, los mataores tornarán al ruedu nesti Xixón de pandereta, una seña bien clara de que Xixón da un pasu más a la mandrecha, y la hestoria, un reblagu p’atrás.
Un par de curiosidaes pa rematar l’asuntu. ¿Sabeis con qu’argumentu se costruyó la Plaza d’El Bibio nel añu 1888? atrayer turistes. ¿Sabeis cuando foi el primer manifestamientu, per otru lláu multitudinariu, de xixoneses contra les corrides de toros? Aldovinasteislo. Nel 1888.
This work is licensed under a Creative Commons Attribution 4.0 International License.
