Los presentes posaron una flor por ca muyer asesinada no que va d’añu, un total de 43 -dos d’elles asturianes-, ensin contar les dos caberes víctimes que se conocíen ayeri mesmo y qu’entrarán ya nel cómputu de la prósima concentración
En 1980, Naciones Xuníes definió la violencia contra la muyer comu “el crimen encubiertu más avezáu del mundiu”. Güei, 40 años dempués, la situación camudó bien pocu. Con eses pallabres entamaba la intervención nesta doceava concentración que, mensualmente, Stop Violencies realiza delantre la Gota Llechi en Xixón comu forma de visualizar la violencia contra les muyeres pol fechu de selo.
Na intervención púnxose voz tamién a la medrana que representa l’ascensión de la ultradrecha, cola so negación d’esta violencia y destacóse que les polítiques específiques y campañes de sensibilización desendolcaes fasta agora pa erradicar esta llácara “nun son abondes porque la realidá que vemos ye mui dura, ca mes nesta concentración añadimos más asesinaes a esta llista prieta de la vergoña”.
Pa finar l’actu, lleóse los nomes de les asesinaes y los presentes -homes y muyeres- foron posando una flor por ca una, creando una alfombra de claveles. Les víctimes tienen pente 3 meses y 89 años, amosando qu’a denguna edá les muyeres tan a salvu de carecer la violencia pol fechu de selo.
Llucía F. Marqués
This work is licensed under a Creative Commons Attribution 4.0 International License.
