“Por muncho que se pongan parriba o pabaxu, vamos seguir falando n’asturianu, vamos siguir utilizando l’asturianu comu llingua vehicular pa toles cuestiones, tamién pa l’alministracion nesti coceyu. Y a quien-y estorbe, si quereis venir a por nos, podeis venir vais tenenos enfrente” Aitor García  Corte, Alcalde Bimenes

“A tres xeneraciones ufriéronmos la oficialidá y sigue ensin aportar… Son too escuses, que si por falta de votos, que si nun te sofito si nun me das esto…” Blanca Inés Fernández Quintana, pregonera

Aitor García Corte reconocía ayeri, na Fiesta la Oficialidá, que nun ta p’aguantar más tonteries, que quien quiera retayar llibertaes o torgar l’usu l’asturianu va alcontralu enfrente porque, comu recalcó “Esto trátase de llibertaes”. El discursu col que l’alcalde Bimenes abrió ayeri la Fiesta la Oficialidá resumió el sentir del pueblu asturianu: fartos d’aguantar ataques, pero non por ello dimpuestos a rendise, sinón tolo contrario. Aprofitó la ocasión tamién pa recordar que lleva años ensin subise’l sueldu  “Esta xente que nos acusa del chiringuito del bable, que sepan que l’alcalde del chiringuitu cobra mil euros al mes, quisiere saber lo que cobra Feijoo, que nun lo sabemos”

Blanca Inés Fernández Quintana, escritora yerbata, foi la pregonera de la Fiesta, unviando un mensaxe d’optimismu “Hai camín pa la nuesa llingua y va seguir habiéndolu, colos  que tamos, colos que vienen detrás, lo mesmo que colos que vinieron delantre. L’asturianu foi pasáu, ye presente y sedrá futuru”. La lliterata reconoció tamién qu’hai muncho por facer, señalando a los culpables de que la oficialidá nun seya güei una realidá “Esto nun ye solo una fiesta,  sinón una reivindicación de lo que pudo haber sido y nun foi. Una alvertencia de que non tolos “favoratibles” lo son a la hora la verdá y un sofitu pa los que seguimos lluchando”.

Darréu l’actu oficial, nel que tamién participó’l vicepresidente de Miranda, hermaná con Bimenes, tuvo llugar la Danza la Oficialidá, na que participaron munchos de los asistentes guiaos pol Grupu Folclóricu Los Yerbatos, y l’amuesa de baille y pasucais protagonizaos por esti grupu y polos Pauliteiros de Miranda, que tornaron a ablucar a toos col so control de los palos. La folixa continuó cola xinta popular y una tardi dedicao a la recreación hestórica y dellos talleres cola reciella, a cargu de los Arqueros de Teberga, pa finar col esperáu conciertu d’Algaire y La Tarrancha. 

Alberto Rodríguez

This work is licensed under a Creative Commons Attribution 4.0 International License.