Güei falamos con Chus Solís, un artesanu dedicáu a la fabricación de gaites y otros istrumentos musicales asturianos
Chus Solís ye la persona que s’alcuentra tres d’ETIMTA (Escuela y Taller d’Istrumentos Musicales Tradicionales Asturianos). Esta empresa ñaz nel añu 2000, aprofitando les ayudes y sovenciones de la CE p’abrir escueles de música tradicional y col enfotu de suplir la falta de profesionales de la gaita, l’emblemáticu istrumentu d’Asturies.
Nel entamu, la idega yera ufiertar servicios de monitores y profesores a les Escueles Municipales, amás de cuntar con un taller propiu. Col tiempu, foi evolucionando dica la fabricación de gaites y otros istrumentos. Magar qu’enantes yeren dellos socios, anguañu Chus ye l’únicu responsable de la empresa y dedícase dafechu a la ellaboración artesanal d’istrumentos tradicionales, magar que caltién la llicencia pa ufiertar enseñanza nun reglada n’escueles y otros llugares.
Nestos 23 años, ETIMTA camuda la so ubicación en delles ocasiones. Nos sos anicios taba na cai Montes del Sueve, n’Uviéu, pa llueu treslladase a Llangréu. Anguañu alcuéntrase en Tiñana.
La llingua asturiana ta venceyada dafechu a ETIMTA y Chus enfótase en promover la nuesa llingua cuandu va peles escueles. Nes redes sociales usa tantu l’asturianu como’l castellanu, pa dar serviciu tamién a los sos veceros non asturianos.
ETIMTA ye munchu más qu’una empresa: ye un testemoñu de l’amor pola música y les tradiciones, el fondu respetu pola cultura asturiana y l’arguyu de llevar en corazón la nuesa identidá.
Susana Sela
This work is licensed under a Creative Commons Attribution 4.0 International License.
