L’añu pasáu quedaron ensin utilizar 67, 52 millones d’euros del presupuestu asturianu por ineficacia ya’l presidente reconoz que nun sabe “porqué mos cuesta tantu executar el gastu”
Un informe del Ministeriu de Facienda y otru conocíu ayeri del oservatoriu Fedea espeyen que los caberos tres años los ingresos qu’entren nel erariu asturianu sumen más que los gastos. En concretu, l’añu 2022 sumó un forru de 67,52 millones d’euros po’l métodu de non execución de les inversiones.
Añu tres añu a los responsables del “Principado” enllénase-yos la boca presumiendo del incrementu del presupuestu axudicáu pa invertir n’Asturies, pero lo cierto ye que’l desfase pente lo presupuestao y lo vraeramente executao dispárase. Entantu, n’otros territorios del Estáu, executen más presupuestu del previstu n’operaciones de capital, incluyendo inversión productiva, destacando los casos de Castilla y León (-1.323 millones), Cataluña (-823) y País Vascu (-779), territorios que ven medrar la so delda, pero tamién la calidá de vida de los sos moraores.
Les declaraciones d’Adrián Barbón, nes que s’amuesa ablucáu pol sobrante, sosprenden al dar a entender de que’ l presidente de l’alministración asturiana nun tien idega de comu se mueven les perres nella, ya que declaró qu’ “hai qu’encargar un informe d’inspeición pa saber porqué mos cuesta tanto executar el gastu”
Aparte de la evidente falta d’inversión en cuestiones qu’urxen, l’aparente sobrefinanciación d’Asturies tendrá consecuencies nel repartu futuru del entá non alcordáu sistema de financiación, y nun van ser positives.
Llucía F. Marqués
This work is licensed under a Creative Commons Attribution 4.0 International License.
