Bonos díes, bona xente.
Alborecemos con estratos na metá norte d’Asturies tando escampláu nel restu con unes temperatures que tan alrodiu de los 18ºC, rexistrándose nel puirtu Payares 8,4ºC.
Güei pali que pali van dir dixebrándose les nubes baxes del alborecer pa quedar el cielu poco nuboso o escampláu, amás les temperatures másimes ascenderán y l’aire sedrá sele ya variable en xeneral.
Mañana miércoles tendremos un aumentu de la nubosidá y los borrinos y nublines del alborecer sedrán persistentes pudiendo dexar dalgo d’orpín pela tarde, amás tendremos nubes de desendolque na cordelera a partir del mediudía que puen dexar dalgún xarabatu de calter tormentosu mui llocal con unes temperatures másimes en descensu.
El xueves los borrinos y nublines sedrán menos abondosos y tendremos apertura de claros na mayor parte d’Asturies pero con nubes de desendolque que dirán n’aumentu pel día pa dexanos xarabatos de calter tormentosu durante la tarde en muncho puntos d’Asturies con unes temperatures másimes que vuelven a subir.
El vienres vamos tener menos nubes y les temperatures siguen n’ascensu con másimes, nidiamente, perriba de los 25ºC anque puen surdir nubes, otra vegada, de desendolque pela cordelera y dexanos dalgún xarabatu de calter tormentosu más llocal y dispersu que’l xueves.
El sábadu los estratos y nubes baxes fadrán que baxen dalgo les temperatures másimes na metá norte d’Asturies y el domingu paez que pue tar más escampláu pero esto yá lu diremos viendo.
Mentantu en Prau Veneiro en Babia a esta hora ta xelando con -1,7ºC, uno de los mayores conxeladores peninsulares.
This work is licensed under a Creative Commons Attribution 4.0 International License.
