Un «cordón sanitariu» en política ye una estratexa utilizada por partíos o coaliciones para aisllar o marxinar a ciertos partíos políticos o movimientos consideraos estremistes, radicales o inaceptables. L’oxetivu del cordón sanitariu ye evitar cualquier tipu de cooperación, alianza o alcuerdu con eses fuerces polítiques y calteneles alloñaes del poder
El términu provien del ámbitu de la medicina, onde s’utiliza para referise a una midida de protección que s’implementa pa evitar l’espardimientu d’enfermedaes. En política, el cordón sanitariu busca protexer el sistema democráticu y los valores fundamentales d’una sociedá. Un cordón sanitariu contra’l fascismu ye una estratexa política utilizada por dellos grupos y partíos partíos políticos p’aisllar y combatir les idegues y acciones facistes. La idega del cordón ye tratar al fascismu como una enfermedá o una amenaza para la sociedá que tien de ser contenida y refugada.
En Xixón el cordón sanitariu nun foi aplicáu polos partíos d’esquierda qu’agora se manifiesten acordonando, con berros y gritíos, la Escuela de Comerciu de Xixón/Xixón. Y pretenden siguir protestando, onde yá non se trata d’una quexa o coacción, sinón “d’acciones golpistes” contra un gobiernu escoyíu democráticamente, gúste o non la resultancia, pero 70.000 xixoneses y xixoneses asina se manifestaron nes urnes.
Al PSOE de Xixón, a la FSA-PSOE, a Podemos y a IX llamóse-yos pa qu’aplicaren el cordón sanitariu a Vox na investidura de Carmen Moriyón de Foro Asturies, y cuál foi la reacción de tola esquierda; pos una portada na ñarices y un non por respuesta. Solo’l sindicatu CCOO fixo un tibiu llamamientu’l día antes de la investidura a la unión de la esquierda contra’l fascismu. Pero nin entá asina los partíos políticos del conceyu se dieren por aludíos. Un solu votu d’un conceyal o concejala del PSOE-IX-Podemos sedría abondo pa cortar el pasu a Vox y aplicar el renomáu “cordón” que nun debe d’aprietar a la izquierda xixonesa, muncho más qu’el d’unos cenciellos zapatos. Nun fueron capaces o a cencielles nun quixeron, porque claro ye muncho más cenciellu, espachase llavandose les manes y calificar como “pactu de la vergoña” a Foru-PP y Vox que votar a Moriyón. Namás facía falta un votu, un solu votu más, pa sumar a los 13 conceyales de Foru (8) y PP (5); otru votu más, solo un votu d’un conceyal/a pa llograr la mayoría absoluta (14) pa investir como alcaldesa a Carmen Moriyón y santes pascues. Depués la gobernabilidad taba abondo salvada porque Vox sedría un simple convidáu de piedra na corporación, colos 13 conceyales de Foru-PP yá tienen la mayoría simple pa gobernar a los sos deleres. Claro, sacantes el PSOE-IX-Podemos y Vox lo torgaren con una moción de censura, opción non descartable anque non deseyable.
El plenu del conceyu ta conformáu por 27 conceyales, la mayoría absoluta son 14 conceyales; si naide tien la mayoría absoluta l’alcaldía ye automáticamente pa la llista más votao, ello ye el PSOE, anque tean en minoría (9 conceyales) y Floro preséntese o non como candidatu pa l’alcaldía. Anque sería un conceyu ingobernable al sumar namá 12 conceyales tola esquierda.
La verdadera vergoña o’l silenciu vergoñosu de tola esquierda ye que nun fueren capaces d’aplicar el cordón sanitariu del que tanto presumen en conxustes y mítines, enchiendo los sos pechos de soflames antifascistes y a la de la verdá ye tou una falacia desenchida por una pinchada.
La fórmula ye tan cenciella, que la aplicó Foro Asturies na Xunta Xeneral del Principáu. Adrián Pumares, l’únicu diputáu de Foru na Xunta, facilitó col so votu la presidencia del parlamentu al socialista Juan Cofiñu por mayoría absoluta; y va sofitar la investidura del Presidente d’Asturies, absteniéndose por qu’Adrián Barbón nun tenga que cuntar, falar nin apautar con Podemos; qu’a lo postrero ta nel otru estremu. D’esta forma, Adrián Barbón va poder ser escoyíu presidente d’Asturies col sofitu de los trés diputaos d’IX, llogrando asina 22 votos, suficientes pa ser investido por mayoría simple, gracies a l’astención de Foro Asturies.
Posiblemente la mayoría la xente nun entienda lo qu’asocedió nel conceyu de Xixón, al arronchase la esquierda de les sos responsabilidaes al resalvar el tan cacarexáu “cordón sanitariu” contra’l fascismu. Fueron ellos los únicos responsables del cataclismu, ciertu que Vox agora con solu dos conceyales nun van influyir pa na na gobernabilidá del consistoriu. Agora bien, tienen una conceyalía, la de Festexos y la presidencia de Divertia; la concejala antroxadora, Sara Rouco, tamién forma parte de la Xunta de Gobiernu municipal. Nun se sabe bién por cuántu tiempu, porque nun par d’entevistes la conceyala facista nun dixo más que tontures. Más bien por conseñes recibíes dende Madrid, la primera allegal dafechu, como suprimir el topónimu oficial de Xixón y, per otra parte, otra falcatrúa racista, xenófoba y etnocida como pretender dende la so conceyalía nun contratar a asturfalantes (actores o actrices, cantautores y cantautores, grupos musicales, monologistes …) y anque nun seya de la so competencia de fiestes, dellos escritores y escritores funambulistes tamién se dan por aludíos; anque escriben en dos diarios filofascistas rexonales en castellán o remanando una disglosia cafiante.
…
La tradición política antiasturiana de los nuesos políticos y polítiques nun ta llueñe y ye bien contemporanea. El presidente socialista Vicente Álvarez Areces, excomunista del PCE, que tomó les riendes del PSOE de Xixón nun Congresu a la búlgara nel que derrocó por un puñáu de votos, al alcalde socialista Jose Manuel Palacio. Tinín Areces, antes de colgar el vezu estanilista, taba más cerca de Abascal na defensa de la llingua española que de l’asturiana. Ye más Areces foi alcalde hasta 1998 y el conceyu de Xixón tuvo qu’esperar al añu 2004, al mandatu de Paz Felgueroso, pa montar una oficina de normalización llingüística; porque lo mesmo qu’ Areces tragaba tortielles españoles con soberbia, nun tragaba sinón qu’odiaba la llingua asturiana. Otru tanto asocede con otru insigne sociata y expresidente tamién del Principáu d’Asturies, comó Juan Luis Rodríguez-Vigil; más conocíu pol “petromocho” que por usar la “llingua” a la que pudo echar, tan guapamente, la culpa de la desgraciada estafa. Agora acompaña a Alfredo Canteli, alcalde popular d’Uviéu/Uviéu, a estampar la so firma a les meses de Vox peles cais de Vetusta. Y güeyu a el Xefes d’Estratexa del PSOE de Xixón y de la campaña de Floro pa l’alcaldía atayada son Dulce Gallego y, poro, Jorge Fernández Llión, almiraos arecistes y fanáticos antiasturianos, son los estrategues de la campaña sociata de la casa’l pueblu del PSOE ‘playu’ que tendríen de ser despidíos o cesaos pol desastre municipal xixonés. Pero non, agora xueguen al golpismu movilizando a un montón de muyeres y en nome del feminismu. Pidiendo dimisiones, cuando ella mesma, Dulce Gallego la ‘alter ego’ femenina d’Areces, negó’l pan, l’agua y, hasta’l sal pa dar un solu votu socialista a Carmen Moriyón pa ser investida como alcaldesa y asina evita-y falar con Vox.
Probes muyeres feministes manipoliaes, tán siendo burdamente utilizaes comu carnaza polos estrategues del PSOE xixonés y los sos mariachis, José Manuel Sariegu y Monchu García, pa pretender foliar a Moriyón, porque si lo que pretenden ye baltala tiénenlo bien complicáu; tantu como los facistes.
This work is licensed under a Creative Commons Attribution 4.0 International License.
