Bonos díes, bona xente.
Alborecemos col cielu escampláu ya con unes temperatures que tan alrodiu de los 15ºC, rexistrándose nel puirtu Payares 14,1ºC.
Güei esfrutaremos d’un día braniegu onde’l sol llucirá tol día y les temperatures másimes sobrepasarán nidiamente los 25ºC, amás l’aire sedrá sele ya variable con delles brises pela costa.
Mañana martes alboreceremos con dalgunos estratos na fastera central asturiana que dirán dixebrándose rápidamente pa volver esfrutar d’un día braniegu, sicasí a últimes hores aumentará la nubosidá pa dexanos el día nuble.
El miércoles la nubosidá sedrá abondosa cola posibilidá de dalgo d’orpín, amás les temperatures másimes van descender bultablemente.
El xueves van dir abriéndose dellos claros y el vienres subirán de nuevu les temperatures bultablemente faciendo que surdan pela tarde na cordelera nubes de desendolque.
La fin de selmana paez que pue ser parecida a esta, el sábadu con bastantes nubes y riesgu de dalguna precipitación feble y el domingu con apertura de claros o abancios pero esto yá lu diremos viendo.
Que paséis un bon día collacies ya collacios.
This work is licensed under a Creative Commons Attribution 4.0 International License.
