Andecha Astur acusa al Ministeriu d’Igualdá de discriminación llingüística pola ausencia del asturianu nel llamáu teléfonu Arcuiris y dirixóse a l’Academia de la Llingua Asturiana, comu muérganu defensor de los nuesos drechos llingüísticos, pa qu’intervenga nesti nueu casu d’asturfobia protagonizáu pol gobiernu español
El recién y tardiamente naguráu sirviciu públicu pensáu pa denunciar casos de fobia contra persones del coleutivu LGTBI atenderá a les víctimes en seyes llingües, español, catalán, gallego, euskera, inglés y francés. Nun tien el nivel del sirviciu d’atención teléfónica 016, pa víctimes de violencia xéneru, qu’atiende les llamaes en 53 idiomes: euskera, catalán, gallego, español, inglés, francés, alemán, portugués, chino mandarín, ruso, árabe, rumano, búlgaro, afgano, albanés, armenio, bambara, bereber, bosnio, brasileiro, cantonés, checo, coreano, danés, esloveno, eslovaco, farsi, finés, georgiano, griego, hindi, holandés, húngaro, italiano, japonés, lituano, mandinca, noruego, persa, polaco, poulaar, serbocroata, sirio, soninké, sueco, tailandés, taiwanés, tamazight, turco, ucraniano, urdu y wolof; pero coincide con esti en ñégase a atender n’asturianu.
Cuando una persona, en situación de shock, llama a un teléfonu d’atención d’esta triba lo normal ye que tenga nervios y lo cabero que necesita ye tener que ponese a traducir la so mala esperiencia a un idioma que nun ye’l de so. Eso entiéndenlo bien dende’l Ministeriu d’Igualdá y por ello ufre atención en delles llingües, 6 pal coleutivu LGTBI y 53 pa les víctimes de violencia de xeneru, siendo ello que munchos de los idiomes que cuenten con traductor trabayando pal 016 tienen menos de diez falantes en tol estáu o incluso ensín presencia confirmada nel país. Coles mesmes, el Ministeriu d’Igualdá nun comprende que los y les asturianes tengan esi mesmu drechu, ñegándose incluso a retrucar a la entruga qu’Andecha Astur fexo direutamente a Irene Montero al traviés d’Agora Repúbliques.
Dende la formación nacionaliega comparen esta discriminación que’l fae’l gobiernu español de PSOE-Sumar-Podemos-IU cola recién prohibición qu’anunció la conceyala Festexos de Vox en Xixón, afitando que se ñegará a contratar artistes asturfalantes, declarando que la represión llingüística sobre los asturianos ye común a tolos partíos d’ámbetu español. Col agravante, puntualicen, de que torgar por asturfobia l’asistencia a una víctima que pue tar en pelligru vital ye más serio que torgar un conciertu musical.
Énte esta situación, Andecha Astur pidió al Ministeriu d’Igualdá que corrixa darréu esa política represiva d’atención a víctimes. Y dirixóse a l’Academia de la Llingua Asturiana, comu muérganu defensor de los nuesos drechos llingüísticos, pa qu’intervenga nesti nueu casu d’asturfobia protagonizáu pol gobiernu español, espublizando comu midía urxente una nota pública que tresllade a los asturianos la so posición.
Redaición InfoAsturies
This work is licensed under a Creative Commons Attribution 4.0 International License.
