Bonos díes, bona xente.
Alborecemos con nubosidá estratificada na fastera central asturiana, tando nel restu el cielu escampláu con unes tempeatures que tan alrodiu de los 18ºC, rexistrándose nel puirtu Payares 13,9ºC.
Güei van dixebrase les nubes baxes de l’alborada nes primeres hores pa dexanos una mañana seliquina y afayaiza, yá pela tarde va dir aumentando la nubosidá d’oeste a este pa dexanos el día nuble anque nun s’eperen precipitaciones hasta’l prósimu riscar. Les temperatures se caltendrán suaves y l’aire sedrá sele ya variable.
Mañana miércoles vamos tener nubosidá abondosa con dalgo d’orpín a primeres hores na fastera llitoral, a partir del mediudía puen dir desendolcandose les nubes na cordelera cola posibilidá de dalgún xarabatu durante la tarde na metá sur d’Asturies con unes temperatures másimes en descensu.
El xueves tendremos apertura de claros o abancios con ausencia de precipitaciones y una subida de les temperatures, paez que’l vienres vamos tener el cielu empuercáu de nubes entemecies ente dellos claros con un llixeru ascensu de les temperatures ya cola posibilidá de dalgún xarabatu de calter tormentosu durante la tarde y el sábadu y domingu la entrada d’una vaguada atlántica fadrá que tengamos nubosidá abondosa y un descensu bultable nes temperatures pero esto yá lo diremos viendo.
Que paséis un bon martes collacies ya collacios.
Semeya de la Ponte d’Arcu
This work is licensed under a Creative Commons Attribution 4.0 International License.
