Bonos díes, bona xente.
Alborecemos col cielu nuboso ya con dalgunes precipitaciones nel llitoral ocidental con unes temperatures altes, alrodiu de los 19ºC, rexistrándose nel puirtu Payares 11,3ºC.
Güei vamos tener el cielu nuboso, sicasí pue abrise dalgún claro o abanciu al mediudía con precipitaciones pela mañana nel llitoral ocidental y col pasu d’un frente a primera hora de la tarde que va apurrinos lluvies nel sur y sobre too nel oriente pela tarde, siendo menos probables na fastera central asturiana. Les temperatures másimes en descensu y l’aire sedrá sele ya variable.
Mañana xueves pali que pali van dir dixebrándose los borrinos y nublines del alborecer pa dexanos un día con nubes ya claros o abancios, tando más escampláu en zones altes de la cordelera, fastera surocidental asturiana ya dellos puntos de la costa. Les temperatures másimes n’ascensu y l’aire sedrá sele ya variable con delles brises pela costa.
El vienres tendremos el cielu poco nuboso o escampláu una vegada que se dixebren les nubes baxes del alborecer, amás les temperatures ascenderán moderadamente y l’ambiente sedrá totalmente braniegu.
El sábadu y domingu vuelven les nubes y amás descenderán les temperatures de forma bultable anque nun s’esperen malpenes precipitaciones pero esto yá lu diremos viendo.
Que paséis un bon miércoles collacies ya collacios.
Semeya de la Mayada de Belbín
This work is licensed under a Creative Commons Attribution 4.0 International License.
