Semeya de Javi Lueje.

David lleva siendo músicu tradicional dende que ñació, comu quien diz, na foguera de San Xuan del 75. Considérase músicu tradicional de tola vida, anque se de¡iere d’alta comu profesional va 30 años. Llaboralmente siempres foi músicu, docente, artesanu y tien la conciencia tranquila ante quien quiera atacalu “Ante cualisquier duda teo una completa fueya de cotización. Nunca pidí una sovención na mio puta vida. Si falo n’asturianu na vida profesional y personal ye porque nun entiendo otra manera d’amosar los sentimientos si nun ye na  llingua de les asturianes y los asturianos”.

Lo primero faenos un resumín de lo que ye’l manifiestu y comu surde.

El manifiestu ye una rempuesta na que s’amuesa’l  descontentu y l’alzar de voz de tol sector musical  y cultural en xeneral sobre unes barbaridaes que se declararon dende la recién nomada conceyalía de Festeyos de Xixón, unes declaraciones que de man vetaben les actuaciones n’asturianu nel conceyu, vulnerando delles lleis d’usu, proteición, promoción del asturianu, lleis de llibre contratación, leis de llibre creación, de llibre pensamientu, etc … y qu’en delles declaraciones posteriores tovía s’enfotaron más en declarar que les actuaciones n’asturianu nun podíen ser  plataformes d’una declaración d’intenciones sobre la oficialidá, pasando ya perriba de lleis de llibre espresión, de llibre pensamientu, ideoloxía… Comentaben amás  que tienen la llave de determinar lo que yera o non tradición verdadera y auténtica.

Falamos d’un manifiestu que foi sofitáu en pocos díes de forma espontanea por más de 4200 persones de xente del sector en tolos niveles y que dexa ver el descontentu de qu’una conceyala pueda facer estes declaraciones, despachándose d’esta manera asina, de baldre ya ensin que nadie-y dixere nada. Too esto surdió de delles conversaciones ente músicos y xente del sector que dende la web músicaasturiana.com ya’l so equipu de xestión  fueron recopilando, dando-y forma y asoleyando nesti aconceyamientu ocasional de músicos, bandes, coros, grupos de baille, etc.

¿Creeis que vraeramente pue llegar a facese real esti vetu a los artistes asturfalantes?

Yo confio en qu’esto nun pueda llevase a cabu pol fechu que te comentaba anantes, ye pasar perriba les lleis, tamos falando d’un discursu que nun tien fundamentu, d’un argumentu  ridículu  al par de triste.

Esti movimiento surdió ensin sofitu políticu a mi gustaríame tener la certeza de que los grupos políticos que conformen la representación de la ciudadanía nel Ayuntamientu de Xixón, qu’amás na so mayoría falen ciertamente de la oficialidá, que nun dexen pasar per altu opciones de censura comu esta.

¿Qué opines de les recientes declaraciones de la conceyala, l’alcaldesa ya incluso Abascal sobre’l tema?

La mio opinión va mui na llinia de lo que se diz el Manifiestu. No que finca a les llei ta bien claro.

Per un lláu a conceyala fala dende un gráu plenu d’inorancia sobre tou lo que cinca al asturianu y a les sos varientes llingüístiques, qu’ella mesma define comu “los bables”. Per otru lláu creo que Carmen Moriyón debería falar con más franqueza, más decisión. Anque ella nun-y pàezan graves esti tipu de declaraciones. Considero que nun debiera de permitiles baxo dengún conceutu. Del restu de comentarios del partíu neofacista, ye ruin, lo que busquen ye ruiu, ye lo que pretenden, ruiu ye de lo que se nutren y de lo que se sovencionen

¿Teméis que pesi a nun facelo de manera llegal pueda haber una discriminación de fechu?

Con declaraciones d’esti tipu ya cola ideoloxía de la que s’abanderen, tar cuatro años tomando decisiones nel conceyu  más poblau d’Asturies, y más en materia de fiestes, que ye un de los fuertes del conceyu,  paez que mete un poco miéu. El vetu nes sos manes pue ser un pocu un arma.

Personalmente tampoco ye que m’asuste, asina de man. Hai que ser optimista, ya queda menos pa que pasen los cuatro años. Lo peor ye que lo que puedan estrozar en cuatro años lluéu cueste muncho más volver a ponenos en llinia col sieglu nel que vivimos.

¿Cómu yera fasta agora el tratu dau pol Conceyu Xixón a los artistes asturfalantes?

Yo creo que siempres hebio una relación cordial colos artistes, falaran o non, tuvieren una u otra ideoloxía.  Solo hai que ver les programaciones de los últimos trenta años, que son los que yo llevo de profesional que pasaron per Xixón artistas de toa índole.

Ye cierto ye que tampocu l’Ayuntamientu de Xixón  amosara una sensibilidá especial pa col asturianu perriba d’otros artistas, en cuestión de sofitu , de lleis pa col asturianu…

Per otru lláu nun recuerdo censura denguna, a nun ser lo d’Albert Pla, precisamente baxo’l mandatu de Carmen Moriyón.

¿Conoces la denuncia interpuesta por Andecha Astur y reunviada por cientos de persones a fiscalía?

Si, entéreme perfectamente  de la denuncia d’Andecha, asina comu de les declaraciones y manifiestos de delles asociaciones civiles del conceyu. Ante la gravedá de les declaraciones d’esta señora, de la Sra Álvarez Rouco y la poca rempuesta por parte l’equípu de gobiernu

Caún tien de vindicar la so posición y usar les aiciones ofensives que tea al so alcance. Entiendo perfechamente qu’una formación política comu Andecha nun permita qu’esti tipu d’argumentos queden asina, impunes.

¿Prósimes aiciones?

Lo primero que ficimos tres presentar el manifiestu y les firmes de sofitu foi meter en rexistru a nome de l’alcaldía y de los grupos con representación, sobre tou los que faen referencia al asturianu na so programación una moción a plenu pa blindar l’asturianu nos eventos festivos y culturales nel conceyu, amás del so usu, espardimientu, promoción, non solo na conceyalía de festexos sinón de la empresa Divertia, que tamién lleva’l Teatru Xovellanos ya’l Festival de Cine de Xixón.

Esperamos que llegue a plenu y sinón falaremos de concentraciones y otru tipu de manifiestos públicos, sobre tou aprovechando’l sofitu que mos tan dando artistes en tol estáu, de proyeición internacional que incluso dalgún d’ellos tien actuaciones contrataes na ciudá.

Tolo que seya visibilizar esti conflictu, que nun parte de nos sinón de les declaraciones que soltó de baldre la conceyala

Esta xunidá del sector ¿Ye puntual o va siguir p’alantre tocando otros temes?

Yera bono da-y una continuidá y que los músicos profesionales ya incluso los aficionaos aprofitáramos la ocasión p’aconceyanos, agrupanos, sindicanos d’alguna manera, solidarizanos porque a la fin equí falten voces d’artistes de toa índole, nun ye namás un casu d’asturianu si o non, yera bueno pa nun tener qu’andar siempres de manera tan dixebrada.

Equí teo qu’agradecer al equipu de xestión de musicaasturiana, que garraren esta baza que dexemos enriba la mesa. A los del Natahoyo tamos avezaos, nun mos resulta desconocío la llucha obrera.

Llucía F.

This work is licensed under a Creative Commons Attribution 4.0 International License.