La formación nacionaliega alerta de que gravedá de la desatención sanitaria algama yá situaciones imperdonables en dalgunos conceyos asturianos, “especialmente nel ocidente’l país, tradicionalmente maltratáu pol PSOE en materia de prestación de sirvicios básicos” y considera que la iminente reestructuración del Gobiernu nun pue ser esculpia p’agravar el déficit d’atención sanitario que trixo’l PSOE
Dende Andecha Astur consideren urxente correxir les polítiques neolliberales que se vienen aplicando na xestión de la Sanidá Pública Asturiana y que la empobinen a una progresiva desatención y privatización. Poro, vienen de pidir al Gobiernu’n fonciones d’Asturies que fine darréu colos recortes de presupuestos, presonal, recursos materiales y prestación de sirvicios que carauterizaron estos años la política de Barbón na sanidá pública, ya que nun ye viable continuar esperando al aniciu’l nueu Gobiernu, entantu población y sanitarios paguen les consecuencies de la falta de financiación y de la mala xestión.
Nesi sen, sofiten les protestes ciudadanes y de presonal sanitariu en Tapia, Navelgas, San Martín de Luiña y otros llugares más. “Esi maltar social, que deriva yá n’allarma, ye la meyor preba de la tradicional mala xestión del PSOE nesta estaya”.
Les cuestiones de les que responsabilicen al gobiernu saliente sol llistes d’espera inasumibles, preslle de centros y sirvicios, pésima xestión de presonal, mengua na dotación de recursos, falta contrataciones, ausencia planificación na Facultá Melecina, falta condiciones de contratación respetables pa los nueos titulaos sanitarios, xerencies propies de multinacionales y non d’un sirviciu públicu prioritariu, númberu creciente de pacientes axudicaos a ca titular mélicu y d’enfermería, derivación de pacientes a hospitales concertaos, voluntá de nun abrir diálogos sinceros y democráticos col presonal sanitariu y munchos más aspeutos de la xestión que compete a la Conseyería Sanidá.
“Güei l’únicu argumentu valible ye la necesidá urxente de dotar la sanidá pública asturiana d’unos niveles de calidá d’atención que garantice l’exerciciu rial del drechu a la salú, que ta ñidiamente’n riesgu coles polítiques neolliberales que tamos careciendo. Dengún otru argumentu pue tener más pesu qu’ési, nin la cris económica, nin l’avieyamientu la población, nin la inestabilidá que puea contaxar los prósimos cambeos na alministración, cola llegá d’un nueu gobiernu”, aporfien, acusando a Barbón y al PSOE d’executar polítiques de dreches colos continuos retayos na pública y l’apertura de puertes a grandes corporaciones privaes del negociu sanitariu.
Redaición InfoAsturies
This work is licensed under a Creative Commons Attribution 4.0 International License.
