La organización del Tsunami enfrenta les consecuencies d’aconceyar na sede de VOX

18 Xunetu, 2023

Les actuaciones pal eventu musical, qu’entama’l 27 de xunetu, tan presllaes de magar el mes de febreru, pero los horarios y los conciertos definitivos entá nun son públicos depués de que l’aconceyamientu de los organizadores con VOX, non na casa conceyu, sinón na mesma sede’l partíu, prevocaren la baxa de dellos grupos participantes

El Festival Indie Sounday, entamáu polos mesmos organizaores esti fin de selmana, foi un caos, cola metá de los conciertos suspendios a última hora y tres hores de retrasu

Strangis Guajes ya International Hardcore All Stars entamaron el movimientu’l díe doce, declarando que decidíen nun participar nel festival, “asina como de cualquier tipu d’eventu que tenga que pasar pel xugu d’un partíu fascista y retrógradu como ye VOX. Tamos convencíos de que non too val, y que les nueses idees y principios tán mui percima de cualesquier cosa”. El motivu del abandonu, l’aconceyamientu que los organizadores del Tsunami Xixón Festival caltuvieron col xerente de Divertia, Oliver Suárez, na sede del partíu. La formación catalana La Élite, que tendría de tocar na tardi’l vienres 28, tampocu tocarán “La Élite nunca participará n’onde’l facismu intente poner la so solombra. ¡Viva la llibertá!” declaraben na so cuenta d’Instagram, añadiendo que l’aconceyamientu na sede de VOX yera humillante pa los artistes.

Más suaves na so reación son les bandes asturianes Desakato, Misiva y Mala Reputación, que, col argumentu de que nun van facelos callar, si tocarán pa Divertia, seique roblen un prevocativu manifiestu conxuntu nel que se definen comu “Antifacistes, favoratibles de la diversidá llingüística, de la oficialidá del asturianu, de la diversidá de xéneru, de la llucha por una sociedad feminista na que se respeten los drechos de les persones LGTBI. Tamos a favor de la redistribución de la riqueza, de la llucha contra’l cambiu climáticu y de los drechos reproductivos de les muyeres, ya en contra’l mercáu económicu, el maltratu animal, del patriotismu ranciu y del racismu”. Estes declaraciones son un pulsu direutu a la Conceyala de cultura, que declaraba va pocu que “Si los espectáculos van ser un apoyu a la cooficialidá, nun vamos apoyalos y si hai mensaxes d’ideoloxíes de les esquierdes nun se programarán.”

Nun falta quien ve na espirica un movimientu intencionáu por parte del grupu facista español de desaniciar un festival reconocíu por traer a Xixón grupos punk y rock d’ideoloxía xeneralmente antifacista ya que foron ellos los que fexeron pública la semeya del aconceyamientu na so sede, a sabiendes de la reación que diba causar. En cualisquier casu, l’aconceyamientu tuvo llugar fuera de los llugares afayaizos pa ello, ello ye, les dependencies municipales, neutres.

La situación paez tar superando a los organizadores del Tsunami, ya que ye xeneralizada la quexa pola falta d’información sobre’l desendolcu del festival, faltando incluso los horarios de los conciertos y los grupos definitivos, a menos de diez dies del so entamu. Per otru lláu, la cellebración del festival Indie Sounday, de los mesmos organizadores, esti fin de selmana foi un auténticu caos, con tres hores de retrasu y una cancelación de la metá de los grupos participantes que nun se comunicó hasta’l mesmu momentu y pola que nun se dieron desplicaciones.