Tomé, enfrentá a la dirección nacional y estatal de Podemos, venía condicionando el so sofitu a Barbón a la formación d’un gobiernu tripartitu de socialistes, IU y Podemos, pero al nun conseguilo nun dudó en dar el so votu incondicional al PSOE
A la fin los restos de Podemos Asturies sofitaron a Barbón incondicionalmente; ello ye, ensin condiciones, negociación nin alcuerdos previos. Los votantes de Covadonga Tomé, neto que los partidarios de Rafa Palacios, en resumies cuentes, dieron el so votu a Adrián Barbón.
El partíu que ñació pa finar cola “casta” y enfrentase a los gobiernos de fasta entós, torna dar pasu llibre al partíu que lleva más de 40 años ocupando la Xunta.
Nuna Cámara entamá por 45 diputaos, Barbón cuntaba colos 19 del Grupu Socialista, a los que sumaren los tres ya comprometios por IU y fasta’l final caltúvose la dulda de la única diputada de Podemos, Covadonga Tomé. Persabíase que, a la primera o a la segunda ronda, Barbón diba tornar ser presidente, asina que’l votu o non votu de la formación morao yera más una declaración de principios qu’un votu necesariu pa que la balanza cayere d’un u otru lláu, descartándose asina la esculpia de que nun dar el so votu “abriría la puerta a la drecha”. Los principios declaraos tan nidios, ser la quinta pata -tan vistosa comu inutil- de la mesa’l PSOE.
Redaición InfoAsturies
This work is licensed under a Creative Commons Attribution 4.0 International License.
