Tremendu esmolecimientu ente los llagareros asturianos que nun formen parte de l’Asociación de Sidra Asturiana –ASSA-
Una sentencia del Tribunal Supremu blinda la botella sidre tradicional asturiana –Molde fierru- pal so usu esclusivu de los llagares asociados a ASSA.
La sentencia qu’en principiu tien una llectura positiva –impide que fuera del país puedan usar la botella de sidre asturiana como vien faciéndose- tien por embargu consecuencies non deseyaes, como ye que de magar agora los llagareros asturianos que nun tean asociaos a ASSA nun podrán corchar la botella de sidre tradicional, y si lo faen sedrá por mor de la bona voluntá que puea tener ASSA –como asina sopelexó-, por embargu una cosa ye la voluntá –que camuda en función de los intereses- y otra los drechos, colo qu’a los llagareros que nun s’apunten na asociación van tar siempres cola espada Damocles enriba.
Hai más, siendo la botella sidre padremuñu d’una asociación particular asturiana, ello nun supón que namás llagareros asturianos puedan corchar la botella sidre, darréu que cualisquier llagareru –seya d’onde seya- que s’apunte a l’asociación podrá facelo.
A la fin, los problemes paecen mayores que los beneficios, non pa l’ASSA, a la qu’hai que felicitar pol so trunfu, y que ye claramente beneficiaria de la situación, sinon p’Asturies como país, que privatiza parte del so padremuñu, y que depende de la bona voluntá d’unos particulares.
¿Cual ye’l problema?
El problema ye’l de siempres, la inactividá y el desenfotu del ‘Principado’, qu’en cuentes d’actuar en representación de tolos asturianos –como se-y supón ye’l so deber- inhibióse dafechu y nun reclamó pal conxuntu de los llagareros d’Asturies el drechu a usar una botella que ye padremuñu de tolos asturianos.
Ello asina, l’esmolecimientu ye xeneral ente tolos llagares asturianos, que ven que nun-yos queda otra qu’asociase a ASSA, o vivir de prestao… porque por supusto, del ‘Principado’ nun s’espera denguna iniciativa compensatoria, tolo más dalgún tuit del presidente Barbón.
Redaición InfoAsturies
This work is licensed under a Creative Commons Attribution 4.0 International License.
