Mariano Suárez relata’n primer persona l’ataque facista que vivió na tardi d’ayeri por llevar la camiseta de Les 6 de la Suiza
Ayeri tuvi pocu tiempu pa escibir y pa too. Pero foi ayeri, sí, 26 de xunetu. Nun sé si tiraba aire malo o había mareona. O les dos coses. Pero pasó ayeri, a les 8’50 la mañana, Cai Álvaro d’Albornoz, en Xixón.
Yo vistía la camiseta naranxa de sofitu a Les 6 de La Suiza. Les seyes compañeres que, por defender sindicalmente a una trabayaora, supuestamente víctima d’acosu llaboral y sesual, foron condergaes pol xuez Lino Rubio Mayo a tres años y mediu de cárcele cauna y a más de 150.000 € de multa.
Bien, pos el Comité de Sofitu a estes compañeres vende per Xixón la célebre camiseta naranxa que yo llevaba puesta, col llema “Facer sindicalismu nun ye delitu”.
Néstes, vien caminando de frente un paisanu mozu (¿la trentena?), bien vistíu, con pantalón de pinza y camisa rayes, repeñau, piel bien moreno, reló bonu, pulserines… Pasa al mio llau y, de sópitu, torna y ponse énte mí, glayando enraxonáu nun perfechu español: “¿Sabes qué camiseta lleves puesta? ¿Sabes qu’esa camiseta ye illegal? ¿Sabes qu’hai unes sentencies d’esti tribunal y d’ésti otru (citábalos) afitando qu’esto nun se pue llevar?”. Fíce-y frente diciéndo-y que se separtase de mí, que dexare de siguime, que vistía lo que me daba la gana, que taba fartucu faches y que tomare vientos.
Viendo que nun me daba, sacó’l móvil. “¿Ah, sí? Pos toi grabándote cola camiseta illegal ésa. Y agora voi denunciate a la Policía, por incumplir la llei”. Pidí que me dexare de grabar, ensin ésitu, y comu me siguía, coyí’l móvil pa llamar a la Policía. Nesi momentu, glayando cola cara desencaxá que me diba denunciar, coló.
A lo primero, hebio un tiempu mínimu nel que creyí qu’aquel especimen tracamundiare la camiseta con dalguna otra. Llueu comprobé que nun hai otres camisetes con conteníu sociopolíticu que seyan paecíes.
De manera que l’energúmenu’n custión sabía lo que dicía y odia, porque aquella cara y aquella voz sólo les xenera l’odiu más fanáticu, odia la llucha de Les 6 de La Suiza y del movimientu social que les defende. Y eso qu’elli nun sabía que yo suelo representar a Andecha Astur nel Comité de Sofitu a les condergaes. Si lo llega saber, igual desixe que me detenga la mesmísima Lexón Cóndor.
O esti puntu ye familiar del panaeru de La Suiza o ye, simplemente, un facista qu’anda sueltu. O les dos coses. En cualisquier casu, la xestión política de la esquierda reformista española demientres los caberos años, xeneró una frustración y desmovilización tala énte la clas trabayaora, qu’agora’l facismu yá gobierna na ciudá de Xixón. Y, claro, estos franquistes de mediu pelu viénense arriba y entamen creyer que les cais yá son de so.
Pero non, enquivóquense. Les voces alloquecíes del facismu nun mos amedranen. Mentantu Les 6 de La Suiza necesiten sofitu y solidaridá, llevaremos estes camisetes. Mentantu Asturies y la so clas obrera necesiten lluchar pa defender los sos drechos y llibertaes, taremos na cai.
Salú y llibertá.
Mariano Suárez
This work is licensed under a Creative Commons Attribution 4.0 International License.
