El Canis lupus de Barbón xuega a “que vien el llobu”

2 Agostu, 2023

Mariano Suárez

Pocu más dañu que’l PSOE se pue facer yá’n materia cultural y llingüística. La solución ta na cai

Barbón, na cabera llexisllatura, la qu’entamó’n 2019, presidió un gobiernu nel que reservó pa sí les competencies propies del presidente xunta les de Política d’Igualdá (con una Direición Xeneral) y les del Retu Demográficu (con un Comisionáu). Nos cuatru años que siguieron amosó la so incapacidá pa deseldolcar polítiques yá non sólo efeutives, sinón riales, en dambes materies. Mesmamente, nin siquier consiguió l’oxetivu más emblemáticu: dexar espublizaes nel BOPA una Llei pa la proteición de los drechos del colleutivu LGTBI y una Llei d’Impulsu Demográficu.

Agora, col estrenu llexisllatura, Barbón suma a la presidencia les competencies rellacionaes con Cultura, Política Llingüística y Deportes, qu’atenderá al traviés de la viceconseyería que pon nes manes de la poetisa Vanessa Gutiérrez. Visto lo visto nos cuatru años anteriores, Barbón tal paez tar faciendo’l pronósticu de que tampocu nun va facer llabor nes competencies que se reservó nesta ocasión.

Lo cualo, si va ser cierto, tampocu nun sedría denguna novedá. Cuatru años d’ermu tuvimos con Berta Piñán comu conseyera de Cultura y Política Llingüística, que por ciertu tenía a Vanessa Gutiérrez d’aidante de cámara, asina que comu siga lo deprendío ellí… Cuatru años valeros, d’inaición política… Lo cualo nestes materies quier dicir de destruición, de perda, de desapaición. Si nun desendolques una potente política de caltenimientu del padremuñu cultural y llingüísticu ésti va sumiéndose. Ye lo que pasó con Berta y la so aidante Vanessa: incumpliendo la llei dexaron cayer montones d’horros y paneres; incumpliendo la llei sólo recostruyeron un puñaín d’ellos; incumpliendo la llei nun avanzaron un res en proteición de drechos llingüísticos; incumpliendo la llei permitieron que l’asturianu tea ca añu más en pelligru desaniciu… Y falar d’horros y de llingua ye sólo a mou d’exemplu. Lo mesmo asocedió col restu les sos competencies na Conseyería. Ehí ta tamién la desapaición de padremuñu hestórico-artísticu na Fundación Selgas-Fagalde, cuandu Berta Piñán yera parte’l Patronatu, o la desapaición de la Obra Cultural de Caxastur énte les sos ñarices.

Si vinieren otros cuatru años d’inaición política’n materia de Cultura y Política Llingüística, esta vegá de la mesma man de Barbón, tan a la so xacobina FSA-PSOE, esperemos qu’Asturies seya capaz d’acumular fuercies, que razones yá tien, pa defender na cai los sos drechos nestes materies.

Ye mentira la razón que da Barbón al dexar pa sí les competencies culturales y llingüístiques: “facer frente a la fola d’involución que pue afeutar a estes estayes”. ¡Que vien el llobu!, glaya dende Presidencia, mentantu pon la mázcara de superhéroe. Ye mentira. El PSOE de Barbón lleva más de 40 años siendo la principal causa d’involución en caltenimientu de la identidá cultural asturiana y en drechos llingüísticos.

Facer creyer agora que ye lóxico tener mieu a que Vox xestioneasuntos culturales o llingüísticos nun ye serio. Los que nunca mos rindimos na defensa d’esos drechos, si a daquién siempres tuvimos mieu foi al PSOE, al braeru culpable de la situación na que mos afayamos agora. La situación d’infensión llegal y alministrativa que vive la xente asturiano en materia de llingua y cultura ye tán grave que qué podría facer una politica facista de Vox. ¿Quitamos una oficialidá que yá se mos ñegó? ¿Dexar d’usar l’asturianu comu alministración, cosa que nun se fae yá? ¿Poner torgues nun procesu d’escolarización que yá ye tercermundista ya ineficaz? ¿Caltener arrequexá y con presupuestu ruín a l’Academia de la Llingua, comu yá asocede? ¿Afalar, comu anguañu, unos medios de comunicación públicos y privaos que nun apuesten pol xorrecer del nuesu idioma? ¿Torgar comu agora’l progresu profesional de quienes son irrenunciablemente asturfalantes? ¿Quitar les sovenciones? ¡Ah, sí, eso sí! Vox podría quitar les sovenciones coles que’l réxime del PSOE fae por domesticar l’asturianismu vindicativu y por adormilar les concenxes que deberíen lliderar una auténtica llucha na cai polos drechos culturales y llingüísticos d’esta Asturies nuesa.

Por si piesllen del grifu de l’adormidera, que lu piesllen. Asina, igual ente toos reactivamos la cai, que ye la braera solución.

Porque Asturies, no cultural, no llingüístico, con Berta o con Barbón, lo mesmo que no sociollaboral y no económico… ¡salvase sólo lluchando!