Solemne izáu de banderes nel Festival Intercélticu de Lorient

5 Agostu, 2023

Les banderes de los diez participantes nel LII Festival Intercélticu de Lorient dieron por entamáu una edición dedicada a Irlanda, pero que cunta tamién con una perpotente presencia asturiana

Si daqué representa Lorient a la perfeición ye la xunidá y puntos comunes ente les naciones celtes, representaes toes en condiciones d’igualdá y colos sos espacios musicales y culturales propios. Poro, tien xacíu qu’el Festival entame -depués del saludu oficial de les autoridaes- col izáu de les banderes que representen estes naciones.

Nun ambiente que xunió lo folixero del alrodiu colo solemne del momentu, los representantes de les estremaes naciones alzaron les sos banderes nel Palaciu de Congresos de la ciodá de Lorient, entamando pola de Bretaña, qu’ascendió al mastil al tiempu que la del país protagonista d’esta edición del Festival, Irlanda. Darréu foi el turnu del restu de banderes, que foron izaes a un tiempu. Iñaki Santianes, responsable de la dellegación asturiana nel Festival, foi l’encargáu de llevantar la bandera d’Asturies, lo que fexo vistiendo’l traxe’l país, neto que la mayoría de los representantes de les estremaes naciones celtes.

Tres d’un añu en qu’Asturies foi la protagonista absoluta, esta edición del Intercélticu la delegación asturiana fadrá por caltener el bon nivel con una participación fuerte y de nivel bien altu que, en pallabres de Santianes “va xugar un papel perimportante”.

El primer pasu d’esti papel va dase güei mesmo, cola Clas Mayestra de gaita que protagonizará Daniel Meré esta mañana, de la man del gaiteru gallegu Ismael García. Tamién güei, a les 14.30 hores, Nel Cortizo, Diego Lobo, Jaime Álvarez y Paula Gutierrez van representar a Asturies nel XXXVI Trophée Mac Crimmon de Gaita.