Bonos díes, bona xente.
Alborecemos col cielu nuboso tanto dalgo más escampláu na cordelera onde tienen delles nubes altes qu’empuercan el cielu con unes temperatures que tan alrodiu de los 18ºC, rexistrándose nel puirtu Payares 9,5ºC.
Güei va caltenese’l cielu nuboso aumentando les nubes pela tarde y dexándonos dalgo d’orpín a últimes hores, amás pela cordelera podemos tener dalguna nube de desendolque que pue dexar dalguna gotera o xarabatín dispersu con unes temperatures másimes en descensu, calteniéndose mui suaves les mínimes. L’aire sedrá sele ya variabe pela mañana rolando a nordés de tarde cuando dirá coyendo puxu.
Mañana miércoles alboreceremos ente’l borrín y la nublina, amás vendrá acompangáu d’orpinos ya orbayos que sedrán más frecuentes ya intensos na metá norde d’Asturies. Pela tarde meyorará dalgo, desaparecerán les precipitaciones y puen abrise claros alrdoiu del cabu Peñes , nes zones altes de la cordelera y fastera más surocidental d’Asturies. L’aire sedrá del nordés sele en xeneral y les temperatures descenderán un poquitín más.
A partir del xueves una nueva masa d’aire africanu dirá ganando terrén faciendo que subán bultablmente les temperatures , situación que pue estendese lo que queda de selmana.
LA MAR:
La temperatura del mar sigue siendo suave, tando ente 21-22ºC, a pesar de lo que diga dalgún floxu perehí, jijijij y la pleamar la tendremos dalgo más allá de les 17:00 h con un altor significativu de les foles de 0,9 m.
Que paséis un bon martes collacies ya collacios.
Semeya de la Xagosa, en Mieres que mos l’apurre la nuesa collacia Consuelo Vázquez .
This work is licensed under a Creative Commons Attribution 4.0 International License.
