Cerca dos mil persones participaron na tardi d’ayeri nel multitudinariu manifestamientu col que los xixoneses tornaben a refugar la “fiesta española” de la tauromaquia, una tradición -la de manifestase’n Xixón a la escontra los toros- que se remonta a va 99 años
Tras d’una pancarta col llema ”N’agostu Xixón tíñese de sangre’, percorrieron delles cais del cientru la ciudá, dende la plaza San Miguel fasta los alrodios de la plaza d’El Bibio, seique l’alministración nun permitió que la protesta finare puramente al par d’ella, teniendo qu’aparar en Cocheres, separtaos por unes valles de la zona d’entrada a la masacre onde unes decenes de protaurinos defendíen la so postura.
La marcha trescurrió pente voces de “Asturies ye Antitaurina”, “Moriyón dimisión”, “Asturies sedrá la tumba del facismu”, “Xixon, espierta, esta nun ye to fiesta”, y “tauromaquia abolición”, pente otros, llamando a los taurinos paletos españoles ya asesinos.
Ye de destacar la impecable declaración d’Adrián Barbón en tuiter, na que se declara antitaurín y afirma que la tauromaquia ye maltratu animal. Cuntamos con que nun seya un tuit más de posturéu y que de les sos pallabres surda la tan necesaria llei contra’l maltratu animal del Principado.
Cabe dicir que si hai una tradición xixonesa relativa a los toros ye la de los manifestamientos a la so escontra, siendo asina que lleven repitiéndose dende l’añu 1914, cuando la Sociedá Antiflamenquista Cultural entamaba un manifestamientu públicu demandando l’anulación de la Feria de Begoña, entamá d’aquella “con envís d’atrayer turistes”. La tradición asturiana de relación colos animales ye bien desemeyada de la española y nun almite la crueldá pa con ellos, menos entá cola esculpia d’una teórica “cultura y padremoñu” que nos son dafechu ayenes y que nun representen sinón precisamente eso, la imposición d’una cultura y unos vezos españoles, que non asturianos.
This work is licensed under a Creative Commons Attribution 4.0 International License.
