“Daquién tinía que dicilo” foi la reaición de munchos de los moraores de Cuideiru al recibir la información de la man de los miembros d’Andecha Astur, qu’ayeri repartíen pente propios y turistes cientos de folletos col llema “El turismu masificáu nun ye la solución, ye’l problema”.

Los foriatos teníen más dificultá pa ver onde ta’l problema, pero reacionaben tamién con comprensión una bones yos desplicaben la importancia de que la so presencia nun repercuta negativamente na vida de la xente’l pueblu y nel entornu. y seya, por contra, una fonte de beneficios pal llugar, xenerando al tiempu meyores servicios pa toos ya un turismu de mayor calidá ya interés, al permiti-yos conocer la identidá del pueblu que visiten.

Esta ye una más de les munches aiciones entamaes por Andecha Astur pa reclamar un nueu modelu de turismu, caltenible, respetuosu pa coles formes de vida tradicionales, la identidá ya’l mediu ambiente y que xenere puestos de trabayu non precarios, apurriendo riqueza a los llugares que reciben visitantes, en llugar d’esquilmar unos servicios ya infracadarmes diseñaos pa poblaciones muncho menores de les que los ocupen nos meses de branu.

Redaición InfoAsturies

This work is licensed under a Creative Commons Attribution 4.0 International License.