Andecha Astur apela a l’autoestima del Pueblu Asturianu nel homenaxe’n Tarna al Conseyu Soberanu

21 Agostu, 2023

Comu ca añu, la formación nacionaliega remembró en Tarna la costitución del Conseyu Soberanu d’Asturies y Llión y a los valientes que cayeron defendiendo’l frente asturianu ente los exércitos facistes

Andecha Astur tornó esti domingu, otru añu más, a visitar les fortificaciones de Tarna n’homenaxe a los asturianos y asturianes que llucharon ellí nel 34 ya’l 37. Tres de la xubía a les trincheres y la visita al fortín ya’l puestu de fusileros, tuvo llugar l’homenaxe y ufierta floral delantre’l monumentu que fai alcordanza d’esta hestórica declaración.

Ellí tuvo llugar la intervención política a cargu de Mariano Suárez, que remembró la insistente voluntá de soberanía del pueblu asturianu “Aquella xente tenía fame de munches coses. Tenía fame. Tenía fame de llibertá, teníen fame de camudar Asturies, pero sobre tou teníen una cosa que tenemos de recuperar, l’autoestima suficiente pa nun renunciar nunca a pidir lo que creyíen xusto pal so pueblu y la so clas trabayaora“.