La formación nacionaliega considera que ye’l momentu de probar con fechos les sos declaraciones escontra la tortura pública d’animales

L’equipu xestión de redes sociales del presidente Barbón quinxo apuntase otru tantu gratis: unes declaraciones diciendo que ye antitaurín convencíu. Y ye que nes redes pue vendese cualisquier moto.

Sicasí, la xestión de décades de la FSA-PSOE y los cuatru caberos años del gobiernu Barbón indiquen otra rialidá: l’aparatu’l partíu navega ente les agües dividíes de la so militancia, una mayoría defensora de les matances de toros y una minoría antitaurina; poro, la práutica política del gobiernu PSOE nun foi la d’acabar cola tortura animal nes places de toros.

En tou casu, Andecha Astur presentó-y a Barbón una propuesta de cincu midíes que, si les adouta, afitaríenlu comu un llíder políticu sinceru, valiente y defensor de los animales. De nun facer casu, quedaría prebao que lo que Barbón diz nes redes sociales ye too propaganda falsa y autocultu al llíder.

Ye cierto que, tres la  llei 18/2013, de 12 de payares, pa la regulación de la Tauromaquia comu padremuñu cultural español, hai pocu marxe llegal pa desaniciar les matances de toros dende los gobiernos “autonómicos”. Pero tamién ye verdá que nin el Gobiernu PSOE-Podemos-IU derogó esa llei nos caberos cuatru años, nin Barbón lo desixó nunca públicamente.

Dende Andecha Astur recalquen que, casu de querer llendar la cellebración d’estos actos, un presidente d’Asturies podría encariar estes cincu midíes, unes ensin posibilidá de rétruca por parte l’Estáu español, otres empobinaes a potenciar el conflictu nesta custión y a forciar nueos posicionamientos de los poderes políticos y xudiciales nel Estáu.

Les cincu midíes son:

1. Mentantu haiga matances de toros, regulación de les presones que puen acudir comu públicu a una matanza toros nuna plaza, escluyendo la posibilidá d’asistencia de menores d’edá.
2. Declarar la Plaza Toros de Xixón comu Bien d’Interés Cultural, integrante entós del Padremuñu Cultural Asturianu. Utilizar dempués esa condición pa regular los usos l’edificiu, llendándolos a usos culturales ayenos a la sofrencia animal.
3. Reforma de la Llei 13/2002, de 23 d’avientu, de tenencia, proteición y drechos de los animales (BOPA 31 avientu 2002), qu’esclúi la matanza toros na midía que tean regulaes por otra llexisllación específico. Camudala incluyendo la prohibición d’espeutáculos públicos de matances de toros y encariar el conflictu competencial que se xeneraría col Estáu español, forciando a un nueu pronunciamientu sol tema del Tribunal Costitucional.
4. Nel marcu d’una negociación col Estáu español sol valir de la vía y conteníu estatutariu, reclamar p’Asturies la competencia esclusiva sobro espeutáculos con animales, incluyendo les matances de toros, pa llueu nun les permitir.
5. Desixir al gobiernu del Estáu español, metantu s’algamen les competencies p’Asturies, la derogación de la la Llei 18/2013, de 12 de payares, “pa la regulación de la Tauromaquia comu padremuñu cultural” (BOE 13/11/2013),
6. Promover una denuncia énte la Comunidá Europea, afitando que la llexisllación española sobro tauromaquia contravién el Pautu Verdi Européu, alcordáu pola Comisión Europea en 2020, y la normativa sobro bientar animal, que diz que los animales tienen drechu a morrer llibres de molesties, llibres de dolor y firíes, y llibres de mieu y angustia.

Redaición InfoAsturies

This work is licensed under a Creative Commons Attribution 4.0 International License.