Nesta ocasión cientren la so reclamación nes condiciones llaborales de los y les trabayaores de tresporte per carretera y nes consecuencies del turismu masivu pal entornu.

“A la fin, colo que mos atopamos, ye que los abusos empresariales, permitios pola Ispeición de Trabayu, xunto col modelu de turismpu masificáu que soporta Asturies tien comu resultáu la precariedá de les condiciones llaborales y salariales de los y les trabayaores del tresporte de viaxeros/es ya l’incumplimientu del conveniu coleutivu“

Namás el plan de tresporte con autobuses llanzadera a los Llagos de Cuadonga tresporta añalmente una media de 250.000 pasaxeros y pasaxeres. Los fines de selmana del branu del 2022 xubieron a los Llagos unes 3.000 persones ca día, llegando a másimos de 6.000 nuna xornada. Pa esti 2023 barrúntense unes cifres tovia más altes. Les consecuencies pa un entornu protexíu son evidentes ya’l pelligru pa los visitantes, al facese l’acesu per unes vies non afayaices pa esi tránsitu fíxose evidente apocayá col acidente del ALSA. 

Les perres que dexa esti turismu nun s’utilicen pa meyorar les condiciones de vida de los moraores de la fastera y los puestos de trabayu que xenera son precarios, aparte de mayoritariamente temporales. Xunto cola hostelería, un de los seutores más afeutaos pola precariedá llaboral asociada al turismu ye’l del tresporte por carretera, cuyes condiciones salariales y llaborales son, en munchos casos, non solo precaries sinón illegales. Dende Asturies Insumisa denuncien les xornaes de trabayu de fasta 14 hores diaries, ensin respetar los descansos obligatorios de doce hores pente xornaes o l’impagu de dellos conceutos salariales marcaos por conveniu, pente les condiciones que soporten los y les trabayaores de tresporte de persones per carretera. 

Los convocantes insisten en qu’Asturies nun pue siguir dependiendo del turismu masivu pa salir alantre, polo que convoquen esti sábadu 26 na rotonda de salida de los buses llanzadera a Llagos pa desixir nuevamente el cambeu de modelu turísticu p’Asturies. 

Susana Sela

This work is licensed under a Creative Commons Attribution 4.0 International License.