La sudafricana Kirsten Neuschäfer tornó a Xixón xusto un añu dempués de que la ciudá asturiana acoyera’l prólogu d’esta vuelta al mundu en vela

Va un añu, la Golden Global Race, la vuelta al mundu ensin escales nin xeolocalización, escoyó Xixón pal prólogu de la so edición tercera. Tres más de 235 díes de navegación, Kirsten Neuschäfer foi la primera en llegar a la meta en Les Sables-d’Olonne (Francia) y convirtióse na primera muyer en dar la vuelta al mundu sola en barcu ensin aparar y ensin emplegar GPS.

Pa celebrar esta victoria, la regatista sudafricana volvió a visitar Xixón, pasar unos díes esfrutando de la ciudá y asina completar la vuelta al mundu. Como reconocimientu, y en representación del Conceyu de Xixón, el conceyal de Deportes, Jorge Pañeda, felicitó a la deportista pola fazaña y apurrió-y un regalu protocolariu. 

Foron 15 participantes na carrera, representando a 10 nacionalidaes. Enantes de la salida oficial en Les Sables-d’Olonne, toos ellos pasaron dos selmanes nel Puertu Deportivu de Xixón, iguando los barcos, en conceyos sobre seguridá y esfrutando de la ciudá, na que coincidieron en Selmana Grande.

De los quince navegantes, cinco dieron la vuelta al mundu y solo 3 clasificáronse por dar la vuelta ensin escala y ensin asistencia: Michael Guggenberger (Austria), Abhilash Tomy (India) y Kirsten Neuschäfer (Sudáfrica). Pero foi esta última, a bordu del Minnehaha, la primera en cruciar la llínia de meta.

La regata Golden Globe ye una de les más importantes nel mundu la navegación, y a diferencia d’otres, tien dientro de les sos normes la prohibición de la navegación con GPS, poro los participantes tienen de guiase coles estrelles. Arriendes d’ello, los barcos tienen de prescindir de cualesquier dispositivu teunolóxicu y tienen de navegar a la antigua.

Susana Sela

This work is licensed under a Creative Commons Attribution 4.0 International License.