La cifra d’operaciones y consultes especializaes pendientes na sanidá pública asturiana ye la mayor dende que se rexistren datos, con una medría del 31% respeuto al 2.016, cuando había 17.145 pacientes n’espera d’una intervención quirúrxica
L’inesorable procesu de desaniciu de la sanidá pública asturiana, propiciáu poles polítiques sanitaries de los socesivos gobiernos del PSOE, pue cuantificase en cifres: 24.667 pacientes esperen por una intervención quirúrxica y 100.576 tan pendientes d’una primer consulta col especialista. La demora media pa una consulta sitúase agora n’84 díes frente a los 61 del branu pasáu. Llamentablemente, tamién pue cuantificase en vides, les de los pacientes que nun aportarán a tiempu a la so consulta u operación.
La situación nun foi tan mala siquiera demientres la pandemia, pesi a los más de diez millones d’euros invertios pola Conseyería de Salú en “planes de choque” colos que teóricamente diba desconxestionase la sanidá pública asturiana.
Redaición InfoAsturies
This work is licensed under a Creative Commons Attribution 4.0 International License.
