Los vecinos del barriu playu aprofitarán les fiestes pa protestar sobro los efeutos del turismu masificáu y la inación del conceyu al respeutu “¡Ye tiempu de cellebrar sí, pero tamién de llevantar la voz!”

Esta selmana entamen les fiestes de Cimavilla, coles que se pon remate a la temporada braniega de Xixón. Na Asociación de Festexos siempres s’enfotaron en dar puxu a la identidá del barriu con muncha creatividá y participación de tolos vecinos, pero esti añu quieren dir un pasu más allá de la simple folixa y aprofitar el momentu nel que tola ciudá mira hacia allí pa facer ver la esmoleceora situación que menacia al barriu más emblemáticu de Xixón. 

La descomanada cantidá de pisos turísticos, con edificios nos que fasta’l 50% de les viviendes tan destinaes a esi fin -la mayoría illegales- sube los costes de la vida nun barriu que siempres foi popular, los llocales comerciales que daben serviciu a los vecinos son agora negocios enfocaos a los turistes y Cimavilla cuerre’l pelligru de tornase’n ciudá de vacaciones.

A ello hai que sumar que l’apueste pol turismu nun va acompangau por meyores en cadarmes nin servicios, sinón qu’al colar los visitantes el barriu queda n’estáu llamentable, amás de vacíu. 

Por ello, comu llamada d’atención, los vecinos de Cimavilla nun decorarán esti añu les sos cases colos tradicionales collores azul y mariellu, sinón que, baxo’l llema “Arde Cimavilla” el colloráu sedrá el collor qu’adorne cais y ventanes, comu señal de la llucha contra la xentrificación ya en defensa del futuru y la identidá del barriu. 

Alberto Rodríguez

This work is licensed under a Creative Commons Attribution 4.0 International License.