La organización considera mui grave que’l formulariu de matriculación del módulu d’asturianu tea “condicionáu al númberu de solicitantes y al nomamientu del profesor

Iniciativa pol Asturianu critica la discriminación del módulu de Llingua y Lliteratura Asturiana nel Centru d’Educación de Persones Adultes (CEPA) de Xixón. El formulariu de matriculación de les distintes asignatures o módulos del segundu nivel recueye que, nel casu del módulu d’asturianu, la matriculación tará “condicionada al númberu de solicitantes y al nomamientu del profesor”. Esto nun ocurre con nengún otru módulu formativu de la escuela pa la formación d’adultos nin con otros centros.

L’asociación recibió la quexa de delles persones que se decataren d’esta puntualización nel formulariu d’inscripción. Esta discriminación al módulu de Llingua y Lliteratura Asturiana nel centru xixonés atenta contra la Llei d’Usu y Promoción del Bable/Asturianu. Tal y como recueye esta normativa nel so artículu 10 “nel exerciciu de les sos competencies, el Principáu d’Asturies va garantizar la enseñanza del bable/asturianu en tolos niveles y graos, respetando non obstante, la voluntariedá del so deprendizaxe. En tou casu, el bable/asturianu va tener que ser impartíu dientro del horario escolar y va ser consideráu como materia integrante del currículu”. Un derechu que se fai estensivu a la educación permanente d’adultos nel puntu 2 del citáu artículu.

La organización de reivindicación llingüística recuerda al alumnáu y a los centros educativos que nun hai sistema de ratio mínimu d’alumnos matriculaos pa poner clases d’asturianu en nengún nivel o estaya educativa. Esta esixencia foi declarada illegal pola sentencia confirmatoria de la Sala de lo Contencioso-Alministrativo, Estaya Cuarta, del Tribunal Supremu, con fecha 24 d’abril del 2012.

Iniciativa pol Asturianu reclama una vegada más que nun haya nengún alumnu o alumna ensin accesu a l’asignatura en nengún centru públicu d’Asturies, tal y como establez la llei. Nun pue ser que l’alumnáu que quiera estudiar asturianu tenga que depender del total de matrícules cuando la normativa nun esixe esi mínimu. Por esti motivu, esiximos la modificación urxente del formulariu de matriculación del CEPA de Xixón suprimiendo esi avisu sobre la matriculación nel módulu de Llingua y Lliteratura Asturiana. D’igual manera, solicitamos a la Conseyería d’Educación que compruebe de forma inmediata si’l restu de centros d’adultos tán incumpliendo de la mesma manera la llexislación vixente, yá que dellos nun cunten tampoco con profesoráu d’asturianu nesti cursu. Afalamos al envíu d’una circular a tolos centros educativos públicos y concertaos recordando’l drechu a la matriculación na asignatura independientemente del númberu d’alumnos y alumnes que lo soliciten.

This work is licensed under a Creative Commons Attribution 4.0 International License.