Nel Díi de la Nación Asturiana, Andecha Astur participa na convocatoria xunitaria d’Asturies Insumisa con una concentración na Plaza’l Parchís de Xixón

Pa la formación nacionaliega, facer de lo que’l ‘Principado’ llama ‘Díi d’Asturies’ una xornada de folixa y fartures supón cellebrar una situación inaceutable na que la falta de respetu a los drechos d’Asturies y del Pueblu Asturianu ta llevándomos a una situación d’indefensión que precariza la vida de les asturianes y asturianos, y que pon en pelligru la propia sobrovivencia como Pueblu.

“Precisamente agora, cuando la esquierda española ta defendiendo la redefinición del Estáu español aceutando la rialidá plurinacional pero escluyendo de nueu Asturies, ye cuando más enfotu hai que poner na defensa de la nuesa identidá nacional y de los nuesos drechos individuales y colleutivos” declaren.

Ello asina, y siguiendo la so dinámica de xunidá d’aición y frente común asturianu, Andecha Astur participa na convocatoria xunitaria d’Asturies Insumisa pa esti prósimu 8 setiembre, en Xixón a les 12:30 h., na plaza’l Parchís, dellantre la que fuere sede del Gobiernu d’Asturies, el Conseyu Soberanu d’Asturies y Llión, cuyu marcu llegal consideren una referencia obligada nuna Asturies a la que se-y impunxo dende Madrid un ‘Principado’ y un Estatutu d’autonomía que “non solo nun respeta la nuesa soberanía nacional, sinón que mos imposibilita la defensa de los nuesos llexítimos drechos ya intereses”.

Ello asina, nesti Díi de la Naciona Asturiana afiten la so voluntá de “dar vuelta a la situación, superar el marcu llegal impuestu, y les polítiques neolliberales coles que precaricen la vida d’asturianes y asturianos, dimpuestos a tresformar el presente y el futuru del nuesu país, reivindicando la nuesa soberanía, y en defensa de los drechos y necesidaes del Pueblu Asturianu”.

Redaición InfoAsturies

This work is licensed under a Creative Commons Attribution 4.0 International License.