Bonos díes, bona xente.
Pero bueno que ficimos al Nuberu, tola fastera central d’Asturies en mayor o menor medida sufrimos los envites de les tronaes durante tola nueche, con bastiazos, munchísimu aparatu elléutricu y dalgo de xarazu o granizu, hai videos de Siero y Mieres que meten miéu.
Agora ta la cosa yá muncho más seliquina ya tenemos el cielu nuboso con unes temperatures que tan alrodiu de los 18ºC, rexistrándose nel puirtu Payares 12,2ºC.
Güei la inestabilidá va centrase na cordelera y fastera oriental d’Asturies onde van tener xarabatos de calter tormentosu frecuentes ya intensos durante la tarde, sicasí na zona d’Avilés, Peñes y Xixón, a primera hora de la tarde, pue vese afeutada per una llinea d’inestabilidá que mos dexará dalgún xarabatu per esa fastera, nel restu sedrá difícil que lleguen les tronaes. Les Temperatures másimes en moderáu descensu y l’aire sedrá sele ya variable, salvo en periodos de tormenta onde puen dase raches fuertes.
Mañana martes vamos tener un tiempu más seliquino, asina y too lloverá dalgo nel llitoral centru-oriental pela mañana cola entrada de vientu de componente norte-nordés que fadrá que baxen les temperatures y la sensación térmica. Pela tarde meyorará y tenderán a remitir les precipitaciones del llitoral, mentantu puen desendolcase les nubes pela cordelera y dexanos dalgún xarabatu dispersu per esa fastera.
El miércoles veremos dalgo’l sol cola apertura de claros o abancios, con un ascensu de les temperatures másimes ya’l xueves tendremos nubes ya claros con dalgún xarabatu dispersu de calter tormentosu pela cordelera durante la tarde.
Y paez que la fin de selmana viniente puen volver les tronaes con fuercia pero esto yá lu diremos viendo.
Que paséis un bon llunes collacies ya collacios.
This work is licensed under a Creative Commons Attribution 4.0 International License.
