El festival, cientráu na cultura sidrera, va desendolcase mientres los díes 18 a 24 de setiembre nos conceyos de Bimenes, Cabranes, Colunga y Sariegu
El festival de la cultura sidrera asturiana contemporánea ta acabante de confirmar tola programación que, mientres una selmana, va enllenar cuatro conceyos de la Comarca de la Sidra d’una amplia ufierta cultural.
Son munches les propuestes destinaes a tolos públicos que se pueden alcontrar nel programa del eventu. Estos son dalgunos de los planes que vas poder atopar nos conceyos onde se celebre’l TrasieguFest.
Per un lláu, no músical, la nueche del vienres 22 va ser el tiempu del grupu folklóricu Trebeyu, que va entamar una nueche en mayanza na plaza del conceyu de Santolaya de Cabranes. La nueche del sábadu tamién va ser musical, con un gran conciertu nel que, de magar les 18:30 y hasta les 02:00 de la madrugada Luis Nuñez y Los Folganzanes, Algaire, La Tarrancha y Llevólu’l Sumiciu van poner a baillar a tolos presentes. La mañana del domingu va tar dedicada a la música pa la reciella. A les 12:00 hores ye’l momentu de Mestura, mientres qu’a les 13:00 hores David Varela va dar un conciertu didácticu familiar na Casa de Cultura de Santuyano, nel conceyu Bimenes.
La reciella sedrá protagonista de les charres prautiques y didáctiques al rodiu de la sidre qu’impartirá Llucía F. Marqués, collaboraora de la Revista LA SIDRA y organizaora de Sidrocoles. Con ello preténdese averar la cultura sidrera a la xente más mozo, faciendo que conozan los procesos d’ellaboración de la sidre y fomentando la creación d’una identidá alredor d’esti productu. Too ello acompañáo d’una esperiencia sensorial na que los participantes van poder comprobar y poner en práutica los estremaos procesos, mayando en direuto sidre’l duernu.
Per otru lláu, desendolcaránse sendos concursos d’escritura sidrera y de semeyes sidreres, un taller de cocina sidrera y delles meses reondes de conteníu sidreru, tocando temes tan interesantes comu la participación de les muyeres nel mundu sidreru, los nuevos caminos na cultura sidrera, la presencia del asturianu na cultura sidrera, el presente y futuru de la DOP Sidra d’Asturies y la presencia de la sidra nes artes.
Les artes, precisamente, tarán presentes al traviés d’una Performance del artistaÁnxel Nava, que fadrá nes cais de Cabranes una actividá artística alredor del mundu de la sidra y de La Buelga Animación, que fadrá una actuación de teatru de cai.
Susana Sela
This work is licensed under a Creative Commons Attribution 4.0 International License.
