La organización ufierta dos niveles formativos y el plazu d’inscripción fina’l 29 de setiembre

Iniciativa pol Asturianu abrió esti llunes el plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia, al traviés d’una plataforma dixital. Los cursos formativos van tener una duración de 36 hores llectives y van entamar el martes 3 d’ochobre y van acabar a mediaos de payares. La organización ufierta la modalidá a distancia porque favorez la auto organización del alumnáu y permite-yos dir faciendo les actividaes según l’horariu de caún, de manera más conveniente.

El nivel inicial del cursu ta dirixíu a persones ensin formación d’asturianu o con nivel baxu de conocencia. El nivel II ta orientáu a persones con una conocencia más fonda del idioma, que yá ficieren dalgún cursu enantes. En dambos casos, los estudiantes que lu superen van algamar una acreitación de l’Academia de la Llingua Asturiana.

El preciu de la matrícula ye de 60 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu. Les inscripciones pal cursu pueden cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción al cursu fina’l 28 de setiembre.

Susana Sela

This work is licensed under a Creative Commons Attribution 4.0 International License.