Adrián Barbón torna tirar balones fuera, escudándose na “falta de competencies” del Gobiernu Asturianu, pero ensin reclamales.  Competencies comu la xestión de los ferrocarriles que circulen dafechu per Asturies nun fueron enxamás solicitaes a Madrid

La reciente cancelación de 25 servicios nes lliníes de cercaníes L’Entregu-Uviéu y  Uviéu-San Xuan sollivianta al presidente. La llaceria del tresporte públicu lleva xestándose munchos años, apiorando bultablemente na cabera llexisllatura. De fechu, la supresión del 5% de les operaciones diaries ye un problema menor comparáu con situaciones d’entá mayor caos que van viviendo los usuarios del tresporte públicu asturianu nos caberos años y que ya xeneraron movilizaciones.

Polo menos nesta ocasión Renfe ta llogrando cubrir les cancelaciones con un serviciu de tresporte alternativu por carretera, con autobuses, microbuses y tasis.

La -llamentable- esculpia pa les cancelaciones ye la falta de maquinistes, o lo que ye lo mesmo, la falta de previsión o la falta d’interés. Lloñe de formar a nuevos operarios pente los asturianos, o d’ameyorar les condiciones p’afalar el relevu xeneracional, la empresa cuenta solucionar el problema con una movilidá de maquinistes d’España a Asturies. 

Esta “falta de profesionales” coincide nel tiempu cola execución de les obres del tercer carril na autovía Y, lo que complica más entá les conesiones pente’l territoriu asturianu. 

Nel Dos Santos

This work is licensed under a Creative Commons Attribution 4.0 International License.