La esposición ye una continuación del trabayu del finlandés que trata problemes de salú mental n’imaxes
The Dark Room (L’habitación escura) pon imaxes, según el so propiu autor, Petri Damsten, a tolos pensamientos destructivos que circulen pol cerebru humán y los sentimientos desmoralizaores, ye, acordies les sos pallabres “l’habitación escura dientro de la to propia tiesta”.
Primeramente inspirada cola banda sonora de la banda de heavy-metal prefería de Damsten, Sentenced, la coleción foi evolucionando escontra una serie d’imaxes vinientes de lo que podría paecer l’interior d’una mente escura. “Depués d’entamar a colgar les imaxes nes redes, empezaron a apaecer comentarios de xente que dicíen que dalgunes d’estes imaxes recordáben-yos los sos propios vamientos. Sobremanera la sensación de que l’aisllamientu provocáu pola COVID 19 fixo aprucir pa munches persones” rellata l’autor.
La esposición, producción de la CE FIAP nel CIMIR de Reus y FotoArtReus, esponse na Pinacoteca Municipal Eduardo Úrculo de Llangréu, Centru Espositivu de La federación Internacional del Arte Fotográfico, cola Collaboración de Asemeyando Asociación Fotográfica dende güei, 14 de setiembre a les 18 hores y va permanecer abierta al públicu hasta’l 30 de setiembre.
PETRI DAMSTÉN, FINLANDIA
Petri Damstén ye un artista fotógrafu escuru y estravagante (nerd) de Kuopio, Finlandia. La so pasión pola fotografía empezó depués de retirase del so trabayu como inxenieru de software y, agora, esquiza’l llau más escuru de la vida al traviés del so arte. Les sos imaxes son de cutiu malhumoraes, surrealistes y esmoleceores, col autorretratu xugando un papel importante na so obra. Ye por ello que tien esperiencia tantu tres comu delantre la cámara. Petri ganó numberosos premios poles sos semeyes en Finlandia y a nivel internacional, incluyendo ser finalista de Fotofinlandia y recibir el premiu PX3 Gold en París, Francia. En 2022 llogró’l títulu Maestru de la Federación Internacional del Arte Fotográficu, MFIAP, cola coleción “Thedarkroom” qu’agora presentamos.
Alberto Rodríguez
This work is licensed under a Creative Commons Attribution 4.0 International License.
