Bonos díes, bona xente.
Alborecemos col cielu nuboso y delles precipitaciones na fastera ocidental d’Asturies con unes temperatures que tan alrodiu de los 17ºC, rexistrándose nel puirtu Payares 8,8ºC onde sopla con fuercia el vientu ábrigu.
Güei vamos tener el cielu con intervalos nubosos y dalguna precipitación feble ya dispersa, más probable nel llitoral con apertura de grandes claros al mediudía. Les temperatures en descensu ya cola aire de componente noroeste que pue soplar con raches fuertes en puntos de la costa y zones altes.
Mañana martes tendremos un día soleyeru y prestosu con unes temperatures mínimes en descensu que refrescarán l’ambiente y mos dexarán un día sanu sin esti chornu que venimos sufriendo últimamente. Pela tarde surdirán nubes de retención nos cordales d’Asturies.
El miércoles subirán les temperatures y nel cielu tendremos nubes medies y altes que puen desendolcase pela tarde ya dexanos dalgún xarabatu. El xueves una borrasca mos averará a la seronda dexándonos lluvies, fuerte vientu, mala mar y descensu de les temperatures pero esto yá lu diremos viendo.
Que paséis un bon llunes collacies ya collacios.
Semeya de la nuesa collacia Vane pla del Gamuniteiru dende la ruta’l Mofusu
This work is licensed under a Creative Commons Attribution 4.0 International License.
