“Nun ye presentable introducir una estratexa de dixitalización na educación ensin disponer de la infracadarma básica de conectividá necesaria pa llevar a cabu dichos procesos” declaren dende SUATEA

Fallos na rede facilitada pola Conseyería d’Educación para l’accesu a Internet torguen el normal funcionamientu docente nos centros educativos d’Asturies a lo llargo de la primer selmana de cursu, siendo más de cien los qu’informen de que nun puen desendolcar normalmente’l so llabor

Non solo ta viéndose afectada la rede d’usu xeneral pal profesoráu, sinón tamién la rede alministrativa que se-yos facilita a los equipos directivos pa les numberoses xestiones que tienen de realizar a diariu, precisamente nel entamu de cursu, cuando ye preciso poner al díe tol sistema.

Ello traduzse en que’l funcionamientu normal de los centros ta siendo bien difícil, o inclusive imposible en dellos casos. Son yá casi 100 los centros educativos que comunicaron a SUATEA que la cayida de la rede atrabanca o directamente torga’l funcionamientu normal de los mesmos. Xeres cotidianes tales como l’accesu a materiales didácticos, la impresión de los mesmos, o’l desenvolvimientu normal de les clases tán viéndose impidíos por esta cayida. Tenemos costancia de que son munchos los docentes que tán teniendo de faer usu de la so propia rede de datos móviles, ello ye, del so propiu bolsu, pa poder proxectar vídeos a los sos escolinos, usar recursos TIC, o, a cencielles, comunicase con compañeros o con otros centros.
Tenemos tamién constancia de que dellos Colexos Rurales Axuntaos (CRAs) tán directamente paralizaos por esta situación, que dura, en dalgún casu, dende entamos de mes. Dellos equipos directivos d’estos centros punxéronse en contactu con SUATEA pa comunicar que se sienten fechos de menos y abandonaos tantu pola alministración educativa como pel so Centru de Xestión de Servicios Informáticos (CGSI), quien repetidamente-yos comuniquen que solucionaron problemes que siguen presentes.
Dende los Centros d’Educación pa Persones Adultes treslládennos que tán viendo afectaes xeres alministratives tan importantes como, por casu, la matriculación del alumnáu, que nesti tipu de centros ta llevándose a cabu estos díes.
Tocantes a la Formación Profesional, el pasáu miércoles empezaben les sos enseñances, y na so sesión inaugural non pudo disponese d’accesu a Internet, lo que imposibilita un empiezu normal de les clases en delles estayes profesionales.

Susana Sela

This work is licensed under a Creative Commons Attribution 4.0 International License.