Lata de Zinc acueye’l 30 de setiembre l’eventu Iruña-Asturies Clash nel que toquen estos grupos punk y ska y tamién hai pinchada reggae
Barricada, El Columpio Asesino, Marea, Lendakaris Muertos, Iseo & DodoSound, Chill Mafia… Pamplona/Iruña lleva siendo dende va más de 40 años la cuna de dalgunos de los grupos más relevantes a nivel estatal de distintos estilos musicales. Pa conocer más a les nueves bandes que tán surdiendo na capital navarra, el sábadu 30 de setiembre va celebrase na sala Lata de Zinc d’Uviéu l’eventu Iruña-Asturies Clash, un alcuentru a ritmu de punk, rock, ska y reggae ente los visitantes Tatxers y Skabidean y los DJs locales de música xamaicana Miguinah Selektah y Raúl Economatu.
Tatxers ye un xoven tríu formáu en 2018 y ta siendo ún de los grupos revelación de la escena punk euskaldun. Recuerden a los primeros Hertzainak, a Kortatu, al punk-rock británicu del ‘77 y amás tienen unos ramalazos pop que los convierte nuna banda enllena de personalidá. Tres de la publicación del so exitosu primer EP Hiruzpalau amets larri, va pocos meses asoleyaron el discu de llarga duración Tatxers.
Skabidean ye una banda que tien al costazu más de 10 años de trayectoria y 300 conciertos. Con 11 persones enriba l’escenariu, tres voces y una sección de metales al completu, formen una auténtica orquesta que fai que’l públicu baille al son del puru ska, rocksteady y reggae. Izaera ye ún de los sos discos más pernomaos, que precede a Hiri Zahar Zikina, el so trabayu últimu.
Música xamaicana
El conciertu va arrancar a les 21h y tien un preciu de 12 € la entrada anticipada -a traviés d’Entradium.com– y de 15 € na puerta. Pero enantes y pa da-y más color al eventu, los DJs de la Cuenca’l Nalón Miguinah Selektah y Raúl Economatu van tar pinchando música xamaicana n’estrictu vinilu dende les 18.30h y con entrada llibre. L’eventu ta entamáu pola promotora de música en llingües minorizaes Ixuxú Cultura, el programa de radio Ximiélgalo Radio Show y la tienda L’Economatu Discos.
Alberto Rodríguez
This work is licensed under a Creative Commons Attribution 4.0 International License.
