Mientres una selmana, los cuatro conceyos de la Comarca de la Sidra esfrutaron de la so bebida estrella al traviés d’esti festival dedicáu a la cultura sidrera asturiana contemporánea, entamáu por VerAsturies y Cuatro Gotes Producciones
La primer edición del Trasiegu Fest remató ayeri colos actos programaos en Bimenes una primer edición que superó les espectatives de la organización. Una primer edición na que la sidra tuvo presente nos conceyos de Bimenes, Colunga, Cabranes y Sariegu al traviés de meses redondes, talleres, música, concursos y tasties, dando-y una visión global y poniendo nel centru la bebida d’Asturies dende un puntu de vista mui actual y cientrándose nel futuru.
Seique los díes principales del festival fueron mientres la fin de semana, les actividaes entamaron ya el llunes 18 col primer de los cincu talleres sidreros pelos colexos, a cargu de Sidrocoles y la primera de les meses reondes qu’a lo llargo la selmana aldericaron sobro’l presente y futuru de la sidre d’Asturies dende estremaes perspeutives.
El vienres arrancaba la parte más folixera, cola nueche en Santolaya de Cabranes, que foi pal baille y la música tradicional. El Trasiegu Fest entamó xunto col grupo folklóricu Trebeyu una nueche en mayanza onde dalgunos de los sones y bailes del repertoriu tradicional asturianu tuvieron presentes. D’esta manera, alredor de 200 persones axuntáronse na plaza del conceyu cabraniegu nuna xornada nocherniega que significó l’empiezu de dos díes de música asturiana al rodiu de la cultura sidrera asturiana contemporánea y qu’atraxo a xente de tolos puntos d’Asturies ya inclusive de fuera de les llendes asturianes.
Al día siguiente, el sábadu, llegó’l tiempu de la nueche musical. Mientres ocho hores, Luis Núñez y los Folganzanes, Algaire, La Tarrancha y Llevólu’l Sumiciu punxeron la nota musical nuna plaza del conceyu de Cabranes que taba enllena. Alredor de 600 persones asistieron a una xornada histórica pal conceyu na que se pudo ver un públicu qu’esfrutó enforma de la música fecha n’asturianu.
A lo último, el domingo entamó cola sección del festival pa la reciella. Mestura y David Varela punxeron el ramu a la parte musical del Trasiegu Fest enseñando a los más mozos la música n’asturianu y una montonera d’instrumentos colos que ye perfácil facer música. Pa rematar, el Palaciu de Martimporra acoyó un taller de cocina sidrera y una mesa redonda al rodiu de la muyer nel mundu de la sidra. El Trasiegu Fest peslló la so primer edición con una tastia de sidres de gala, onde los productos nuevos de Viuda de Angelón, Trabanco y Valverán fueron les protagonistes.
El director del Trasiegu Fest, Inaciu Galán, quixo destacar “l’ésitu d’esti eventu y la rempuesta bien participativa del públicu, que fixo poner en valir la cultura sidrera contemporánea asturiana”. La primer edición del Trasiegu Fest yá ye hestoria, pero los camientos ya tan na segunda col envís de siguir poniendo en valir la sidra d’Asturies.
Susana Sela
This work is licensed under a Creative Commons Attribution 4.0 International License.
