Xixón y Nava sedrán les sedes que, del 28 al 1 de setiembre acoyerán el XIII Salón Internacional de les Sidres de Gala –SISGA- un alcuentru cientráu nos profesionales del seutor sidreru pero que dientro del so bayurosu programa d’actividaes ufre al públicu xeneral la oportunidá de conocer de primer man el panorama más internacional d’esta bébora.
La meyor opción pa quien quiera conocer y tastiar les sidres del mundiu presentes en Xixón esti fin de selmana ye acudir a la Tastia Abierta al Públicu, nel Pabellón de Congresos de la Feria Internacional de Muestres d’Asturies, n’horariu de 12 a 15 y de 17 a 20 hores. Allí, con una entrada de namás diez euros habrá la posibilidá de prebar sidres de cuatro continentes, una oportunidad única de tener una imaxen global de la actualidá sidrera mundial, cola opción de prebar fasta 287 variedaes sidreres de la man de los sos propios ellaboraores o incluso mercar dalgunos de los productos. Dientro d’eses variedaes alcontraremos sidre brut, esplumoso, tranquilo, de xelu, de fuéu, semiseco, en vermú o auguardiente, pente otres opciones.
Amás de la esposición y tastia de productos, esa mesma xornada cellebraránse delles presentaciones de sidre por parte los sos productores: l’alemán Jörg Geiger, de Manufactur Jörg Geiger ya’l llagareru asturianu Francisco Ordóñez de Viuda de Angelón, pela mañana; l’irlandés Eamon Lucey, de Stonewel, los letones Dace Smiltniece y Māris Plūme pela tardi. Tamién se fadrá un percorríu pela sidre chileno de man de Pascual Ibáñez, Sumiller autor de ‘Guía de la Sidra en Chile’.
Pa completar, la charra “El papel de los hosteleros na prescripción de la sidre” a cargu de Mª José Oliveira -Sidraría Celta Endovélico- y Jaime Filipe Barros -Portal da Sidra- dará una visión del mercáu sidreru dende’l puntu de vista de los importadores.
Pa quien quiera tener la oportunidá de pasar más tiempu colos productores esfrutando de la sidre, queden dalgunes entraes a les espiches que se fadrán en Nava y en Xixón, el vienres ya’l sábadu respeutivamente. Pero si lo que se busca ye un eventu fuera de lo avezao, recomendamos -previa reserva y por rigurosu orde d’iscripción- participar nel Brunch de Gala que precederá la entrega de los Premios SISGA el domingo, nel Restaurante El Duque, una esperiencia gastronómica perinteresante que demuestra comu la sidre pue satisfacer los paladares más desixentes.
La participación presencial nel Brunch de Gala va tar llindada en cuanto al númberu participantes y tien un costu de 65 € por persona, entantu que’l costu de les espiches ye de 35 €. N’ambos casos, p’apuntase ye preciso ponese en contautu cola organización nel corréu fasturies21@gmail.com o nel teléfonu 684644711, siguiéndose un rigorosu orde d’iscripción fasta completar l’aforu.
Toes estes esperiencies son perinteresantes pa los mantes de la sidre en xeneral, pero mui especialmente pa los profesionales del seutor, que tendrán la oportunidá de contautar con esportadores y productores en direutu.
Susana Sela
This work is licensed under a Creative Commons Attribution 4.0 International License.
