Caberu miércoles del mes de septiembre, comu ca mes toca remembrar a les víctimes de la violencia machista y reforciar el compromisu contra esta llácara social
La cita ye güei a les siete la tardi delantre l’edificiu de La Gota Llechi, en Xixón. Una pancarta contabilizará’l númberu d’asesinaes por ser muyeres en tol estáu, una cifra que’l mes pasáu algamaba les 71 muyeres, d’ente 8 y 87 años, pero un fin de branu prietu subi esa cifra fasta les 85, acordies los datos recoyios en feminicidios.net. Nesa cifra inclúinse muyeres asesinaes pol so compañeru sentimental/sexual, los asesinatos infantiles a manes del pa o de la pareya de la ma, los que vienen darréu d’una agresión sesual, los de muyeres en situación de prostitución, los trasfóbicos, lesbofóbicos, racistes y por mutilación xenital.
Les ocho víctimes d’esti mes de setiembre (hai otros dos casos entá n’investigación) correspuenden a “asesinatos íntimos”, ello ye, muyeres asesinaes pola so pareya.
De magar l’añu 2010, añu en qu’entamaron a documentase los feminicidios nel Estáu español, hai rexistraes 1.459 muyeres asesinaes por homes.
Los convocantes son Andecha Ástur, Anticapitalistes, Dar de mamar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Susana Sela
This work is licensed under a Creative Commons Attribution 4.0 International License.
