Padremoñu, cultura, arte, gastronomía, música y mundu rural van de la man esti vienres 29 en La Benéfica de L’Infiestu
Too entamó cuando va unos meses La Granja Lab -llaboratoriu d’innovación alimentaria qu’apuesta pol mundu rural y la tecnoloxía- encargó-y a la marca asturiana Puru Remangu un diseñu de camiseta pal eventu La Granja Summit.
El resultáu foi una ilustración que creaba l’horru del futuru, nel que la tecnoloxía respete la tradición y seya una ferramienta p’avanzar, vivir, trabayar y crear dende’l mundu rural. Agora esta collaboración da un pasu más col eventu L’Horru, iconu d’innovación y tradición.
“Un horru ye l’iconu por escelencia de los nuestros pueblos y del mundu rural. Ye tradición, cultura, identidá y patrimoniu”, con estes pallabres desplica Puru Remangu por qué escoyó l’horru como símbolu y por qué l’eventu del próximu vienres 29 en Piloña va axuntar patrimonu, cultura, arte, gastronomía y música colos horros como protagonistes.
L’eventu arranca a les 16h en La Benéfica cola actividá L’Horru: una obra d’arte. Ye una amuesa d’arte na que participen 10 artistes d’Asturies que van tar pintando en directo pa facer la so propia representación d’un horru y del so universu. Va durar hasta les 20h y ye abierta a tola xente que quiera pasar per esti espaciu piloñés. Colores, llenzos, broches, pinceles, acuareles y creatividá pa facer obres d’arte con identidá asturiana.
La xornada sigue cola visita guiada Conoz los tos pegoyos pel complexu d’horros d’Espinaréu, ún de los pueblos asturianos que más construcciones d’esti calter tien. Ente les 16.30h y les 18.30h l’Asociación del Hórreo Asturiano va afondar no que son los horros,les paneres y los iconos del mundu rural asturianu. Les 60 places disponibles pa esta visita d’hora y media repartida en dos turnos esgotáronse en menos de 24 hores.
El programa complétase col Showcooking. Un bocáu, un tragu, una canción . Nél los cocineros Lluis Nel Estrada y Marcos Cienfuegos van dar un taller gastronómicu y musical nel que desarrollen tres
bocaos nos que los ingredientes principales son productos que s’almacenaben nos horros o embaxo d’ellos. Cada bocáu va tar maridáu con un tragu y con una canción en directo interpretada por Alfredo González y Silvia Quesada. L’actividá ye a les 18h y l’aforu llibre, anque les 40 places pa tastiar lo cocinao tamién tán escosaes.
Amás d’esto en La Benéfica La Granja Lab amuesa una esposición diseñada por Los Patos centrada nos alimentos positivos pa la naturaleza, va haber un puestu de Puru Remangu nel que se van vender
n’esclusiva la colección de camisetes “Horru”, les mascotes van poder afayase y tastiar los yogures X Yowup!, el food truck La Fartukona va ufrir comida asturiana pa fartucar, La Maléfica va encargase de
poner el chigre y Mediocre DJ va tar pinchando ente actividá y actividá. Too ello con entrada llibre ente les 16h y les 20h.
Alberto Rodríguez
This work is licensed under a Creative Commons Attribution 4.0 International License.
