Esti sábadu’l Muséu del Pueblu d’Asturies tornará acoyer la folixa más familiar y prestosa del añu, na que los protagonistes son, comu’l so nome alantra, la reciella asturfalante
El Muséu del Pueblu d’Asturies aconceyará mañana a les families qu’apuesten pol asturianu na educación de los sos fíos, nuna xornada d’arruelu, esporte y música pensada pa los más piqueños de la casa
L’Asociación Cultural Reciella, Families pol Asturianu, vien cellebrando de magar l’añu 2.013 esta folixa abierta a tol que quiera averase y na que toles actividaes tienen como llingua vehicular esclusivamente l’asturianu.
La xornada d’arruelu empobinada a families entamará a les once la mañá col repartu de dorsales pa la carrera más divertía del añu, Entaina, na que ye tan emportante esfrutar comu correr y na que llegar primeru o caberu pocu importa. De magar entós y fasta les siete la tardi, cuando se ballará la Danza Prima, sucederánse estremaos talleres, dende moda y desfiles fasta un mundialín de fúbol, pasando por origami, axedrez y cosplais, ensin que falte, por supuestu, la música.
Una xornada serondiega d’alcuentru nel que les families asturfalantes pueden esfrutar na llingua llariega y les que nun lo son pueden averase pa dir deprendiéndola.
Susana Sela
This work is licensed under a Creative Commons Attribution 4.0 International License.
