Bonos díes, bona xente.
Alborecemos con nubes baxes la fastera central asturiana, tando poco nuboso o escampláu nel restu con unes temperatures que tan alrodiu de los 18ºC, rexistrándose nel puirtu Payares 14,1ºC.
Güei la nubosidá baxa pue ser persistente na costa centru-oriental d’Asturies y surdir pela tarde na ocidental, abriéndose dellos claros na fastera central nes hores centrales del día y tando escampláu nel interior y cordelera con unes temperatures que van tar condicionaes poles nubes baxes ellí onde seyan persistentes y con un ascensu moderáu nel restu, amás l’aire sedrá sele ya variable.
Mañana sábadu mos llibraremos de les nubes baxes, sicasí’l cielu pue tar dalgo empuercáu de nubes altes con unes temperatures másimes qu’algamarán los 30ºC en munchos puntos d’Asturies. L’aire seguirá siendo sele ya variable con predominiu de la componente sur.
El domingu más de lo mesmu pero con un llixeru descensu de les temperatures que malpenes vamos a notalo y ye probable que sigamos con esti tiempu seliquino y caluroso hasta la viniente fin de selmana.
Semeya que mos l’apurre’l nuesu collaciu Xuan Nel Gonzali de La Llinar, dende La Peral (conceyu d’Illas).
Que paséis un bon fin de selmana collacies ya collacios.
This work is licensed under a Creative Commons Attribution 4.0 International License.
