Bonos díes, bona xente.
Alborecemos col cielu poco nuboso, sicasí hai dalgo de nubosidá alta, sobre too na fastera más surocidental d’Asturies con unes temperatures que tan alrodiu de los 14ºC, rexistrándose nel puertu Payares 8,9ºC.
Güei van dir n’aumentu les nubes altes que mos dexarán el cielu emporcáu con unes temperatures n’ascensu y col aire que de momentu sedrá sele ya variable anque a últimes hores pue entamar a soplar con fuercia en zones altes de la cordelera.
Mañana martes l’aire ábrigu va facese notar en zones de la cordelera y valles averaos, amás fadrá que la nubosidá s’acumule na vertiente sur de la mesma onde dexará precipitaciones, nel restu sedrá mui poco probable y predominarán les nubes ya los claros o abancios con unes temperatures n’ascensu, condicionaes pol vientu de componente sur.
Tantu’l miércoles como’l xueves la situación sedrá mui asemeyada pola posición de la borrasca que tará enfrente de les costes gallegues, nun sedrá hasta’l vienres cuando pase al Cantábrico, faciendo rolar los vientos a componente noroeste sobre too’l sábadu que mos apurrirán un descensu bultable de les temperatures, nubosidá abondosa que vendrá acompangada de precipitaciones xeneroses ya nieve nos puertos de montaña pero esto yá lo diremos viendo.
This work is licensed under a Creative Commons Attribution 4.0 International License.
