El gastu n’atención a persones en situación de dependencia cayó n’Asturies un 10,8% , algamando a 1.448 persones menos que nel añu anterior, con una prestación media por persona beneficiaria al añu un 3,8% menos que nel añu anterior
L’incrementu de l’aportación de los Presupuestos Xenerales del Estáu pa cubrir les necesidaes de les persones dependientes nel añu 2.022 valió n’Asturies pa que’l Gobiernu del Principado ficiere caxa, ya que mientres recibió más perres estatales el fechu ye que’l gastu n’atención a la dependencia cayó n’Asturies cuasique un once por cientu.
Asturies preslló l’añu con 2.244 persones col drechu a l’aida a la dependencia reconocíu, pero ensin saber cuando diben cobralo. El setiembre d’esti añu la cifra medrare en 220 persones más, xente con una necesidá reconocía que sicasí lleven más de mediu añu esperando a que se-yos de, espera que nun tien dala xustificación, nin económica (el Principado recibió más financiación con esti destín que n’años anteriores) nin burocrática (la necesidá ta ya reconocía).
La espera ente solicitar la valoración de la dependencia y algamar el certificáu que reconoz a una persona comu beneficiaria de la dependencia fue de 141 días de media, pero una bones se consigue esi certificáu hai otra media de 110 dies hasta recibir los beneficios reconocíos; 22 asturianos morrieron nel 2.022 esperando por esa aida, qu’enxamás nun yos llegó.
Teniendo en cuenta el progresivu avieyamientu de la población asturiana y la xubía esponencial de los costes esti añu ye de xacíu que la población dependiente medró nesti caberu añu y les sos necesidaes económiques sedrán mayores.
Sicasí, el gastu n’atención a persones en situación de dependencia cayó n’Asturies un 10,8% , algamando a 28.315 persones, 1.448 menos que nel añu anterior, con una prestación media por persona beneficiaria al añu de 9239,5 € de media, menos 3,8% por persona respeutu al añu pasáu. Ello ye, menos perres por persona, pa menos persones, recibiendo más perres d’0rixe estatal.
Alberto Rodríguez
This work is licensed under a Creative Commons Attribution 4.0 International License.
