Alcontramos nel tuiter de Gerardo Tecé, autodefiníu “Obreru de xuntar pallabres en CTXT” esti maxistral testu que resume l’actualidá del conflictu palestín en clave d’ironía.

Lleeilu y lluéu si eso vais a la mani esta tardi; o non, qu’eso de reclamar los drechos de los pueblos ye mui de terroristes

Israel nun invade Palestina. A cencielles foi tomando terrenos que nun yeren sos pa asina defendese de forma más espaciada. Israel llucha contra’l terrorismu. Lo que pasa ye que la meyor forma de lluchar contra’l terrorismu ye matando a los terroristes cuando entá son neños.

Cuando Israel bombardea edificios de viviendes siempres muerren inocentes. Pero esto débese a que los terroristes usen a los inocentes como escudos humanos. Dícen-yos que vaigan vivir a edificios de viviendes y asina, cuando Israel bombardea edificios de viviendes, muerren inocentes. Ye tou una maniobra por qu’Israel quede mal énte’l mundu. Menos mal que nun cuela.

Israel asesinó a 15 periodistes y decenes de trabayadores de oenegés nuna selmana, pero ye porque los periodistes y los voluntarios son xente bien dexada y que suel abusar de la barba ensin iguar, adquiriendo asina un aspeutu de terrorista que xenera muncho tracamundiu. Lleva cámara y chalecu de prensa, porta una camiya o comida y agua, pero tamién lleva barba a lo Hamás. Ye fácil opinar dende’l sofá, pero cuando tienes el misil apuntando a una ambulancia nun ye fácil esclariase.

Israel dexó ensin lluz, agua y comida a dos millones de persones porque Israel ta lluchando contra’l terrorismu. O pienses que los terroristes nun comen y beben agua.

Israel lleva 10 díes bombardeando edificios, hospitales y colexos de Gaza y matando nellos a miles de persones -de terroristes, perdón-. Facer pa defender la democracia. A pesar de los hospitales, ambulancies y corredores humanitarios bombardeaos estos 10 díes, Israel nun tien na que ver col misil llanzáu güei contra un hospital nel que morrieron 800 persones y qu’espantó al mundu. En cellebrando que mataren a un montón de “animales” -asina llamen a los palestinos de manera cariñosa porque son bien animalistes-, vieron la reacción mundial y decatáronse de que nun fueron ellos, sinón los mesmos palestinos.

Asina ye. Los palestinos asesinaron a 800 palestinos güei en metá de los bombardeos de misiles israelinos, tal que demuestra un vídeu del añu pasáu nel que se ve un cohete de Hamás. Vese un cohete porque Hamás nun tien misiles, pero nun entremos en pequeñeces. La cosa nun queda ende. Según ta investigandose pudiere ser que los 800 muertos palestinos s’autolesionaren nos últimos díes consiguiendo asina una escusa pa dir al hospital y morrer toos de golpe tres la esplosión del misil, xenerando asina titulares colos que poder echa-y la culpa a Israel.

Israel nun miente. Israel nun ye un Estáu Terrorista. Israel nun ta executando nengún xenocidiu.

This work is licensed under a Creative Commons Attribution 4.0 International License.