Bonos díes, bona xente.
Alborecemos col cielu mui nuboso y precipitaciones xeneralizaes, amás vienen acompangaes de fuertes raches de vientu en puntos del llitoral y zones altes con unes temperatures que tan alrodiu de los 14ºC, rexistrándose nel puertu Payares 5,3ºC.
Güei vamos tener una mañana movida con xarabatos frecuentes, raches de vientu, temperatures en descensu ya inclusu dalgo de nieve nes cumes más altes de la cordelera. Yá pela tarde l’aire de componente noroeste va amenorgar y tender a rolar a gallegu faciendo que les precipitaciones se pierdan pela mar y malpenes entren tierra dientro. Les temperatures descenderán bultablemente y la sensación térmica baxará abondu pol aire.
Mañana sábadu meyorará anque tovía tendremos dalguna precipitación que sedrá más probable pela costa y l’ascensu de les temperatures másimes va ser llixeru, mentantu que les mínimes descenderán moderadamente. L’aire perderá fuercia, sicasí va quedar dalguna racha moderada en zones altes ya en puntos del llitoral.
El domingu vamos tener el cielu cubiertu pero sin malpenes precipitaciones y l’aire ábrigu fadrá subir les temperatures másimes.
Que paséis un bon vienres collacies ya collacios.
Yá ye época d’amagüestos, semeya que mos l’apurre Consuelo Vázquez.
This work is licensed under a Creative Commons Attribution 4.0 International License.
